ऋण लिने सोचमा हुनुहुन्छ ? कुन बैंकको ब्याजदर सस्तो !

जमुना भण्डारी
काठमाडौं,मंसिर १० – के तपाई व्यापार व्यवसाय अथवा घरजग्गा खरिदका लागि बैंकबाट ऋण लिने सोचमा हुनुहुन्छ ? यदि बैंकबाट ऋण लिने सोचमा हुनुहुन्छ भने एकपटक कुन बैंकमा कति आधारदर छ भन्ने कुरा जानी राख्नुहोस् । ऋण लिने जो कोहीले सकेसम्म ऋणको ब्याजदर सस्तो परोस् भन्ठान्छ । यसका लागि त्यस बैंकको आधार दरमा निर्भर रहन्छ।

आधार दरले नै कुनै पनि बैंक तथा वित्तीय संस्थाहरुबाट ऋण लिँदा सस्तो वा महंगो ब्याज तिर्नु पर्छ भन्ने निर्धारण गर्दछ । सामान्यतः जुन बैंकको आधार दर कम हुन्छ, त्यो बैंकको ऋणको ब्याजदर पनि सस्तो पर्न जान्छ। यसले गर्दा ऋणीलाई केहि सहज हुन जान्छ ।

वाणिज्य बैंकहरुले हालै जारी गरेको चालू आर्थिक वर्षको त्रैमासिक वित्तीय विवरण अनुसार अधिकांश बैंकको आधार ब्याजदर घटेको छ । लामो समयदेखि तरलता अभाव झेलिरहेका बैंकहरुले यसको समाधान गर्न नसकेता पनि आधार ब्याजदर भने घटाएका हुन् ।

आर्थिक वर्षको पहिलो त्रैमासमा २८ वाणिज्य बैंकहरुको औसत आधार दर ९.५८ प्रतिशत छ। यदि तपाई वाणिज्य बैंकहरुबाट ऋण लिने हो भने सबैभन्दा सस्तो राष्ट्रिय वाणिज्य बैंकको ब्याजदर रहेको छ । राष्ट्रिय वाणिज्य बैंकको आधारदर ६.६० रहेको छ । त्यसै गरी सरकारी लगानीका बैंकमा सबैभन्दा महंगोचाहीँ कृषि विकास बैंकको व्याजदर रहेको छ । कृषि विकास बैंकको आधारदर १०.१८ रहेको छ ।

त्यसै गरी आधार दर कम भएका निजी लगानीका वाणिज्य बैंकहरुमा स्ट्यान्डर्ड चार्टर र नबिल बैंक रहेका छन् । स्ट्यान्डर्ड चार्टर बैंकको आधार दर ७.६३ रहेको छ भने नविल बैंकको आधार दर ७.९४ रहेको छ । सरकारी बैंकमा नेपाल बैंकको आधारदर पनि ७.८४ मात्र रहेको छ ।

चालू आर्थिक वर्षको त्रैमासिक वित्तीय विवरण अनुसार तीन बैंकको आधारदर ९ प्रतिशत भन्दा कम रहेको छ । इन्भेष्टमेन्ट, एभरेष्ट र हिमालयन बैंकको आधार ब्याजदर ९ प्रतिशत भन्दा कम रहेको छ । नेपाल इन्भेष्टमेन्ट बैंकको आधारदर ८.४८ छ भने एभरेष्ट र हिमालयन बैंकक्रमश ८.५२ र ८.९३ रहेको छ । यी बैंकहरु पनि तुलनात्मक रुपमा सस्तो ब्याजदरमा कर्जा दिने बैंकहरुको सूचीमा पर्दछन् ।

ब्याजदरको हिसाबले १० प्रतिशतभन्दा कम ब्याजदर मा ऋण दिने बैंकहरुमा सानिमा, प्राइम, सनराइज, एनआइसी एसिया, ग्लोबल आइएमई, एसबिआई र नेपाल बंगलादेश बैंक पर्दछन् । यी बैंकहरुलाई मध्यम स्तरको बैंकको रुपमा लिइन्छ । यी बैंकको आधार व्याजदर क्रमश ९.२१,९.६७, ९.९७, ९.५१,९.४४, ९.९४,९.८४ रहेको छ ।

कर्जा लगानीमा महँगो ब्याजदर लिने बैंकहरुले आफ्नो आधारदर १० प्रतिशतभन्दा बढी राखेका छन् । यस्ता ब्याजदर हुने बैंकहरुलाई महँगो बैंकका रुपमा लिइन्छ । त्रैमासिक वित्तीय विवरण अनुसार १३ वटा वाणिज्य बैंकहरुको आधार ब्याजदर १० प्रतिशतदेखि ११ प्रतिशतसम्म रहेको छ । ती बैंकहरुमा सिद्धार्थ, बैंक अफ काठमाण्डू, जनता, कृषि विकास, मेगा, लक्ष्मी, एनएमबी, माछापुच्छे, कुमारी, सिटिजन्स्, सेञ्चुरी कर्मशियल, एनसीसी र सिभिल बैंक रहेका छन् ।

१० प्रतिशत भन्दा बढी आधारदर हुने बैंकमा सबै भन्दा बढी सिभिल बैंकको रहेको छ । सिभिल बैंकको आधारदर ११.११ रहेको छ । त्यसै गरी सिद्धार्थ र बैंक अफ काठमाण्डूको समान १०.०२ रहेको छ भने जनताको १०.१३, कृषि विकास बैंकको १०.१८, लक्ष्मीको १०.२४ रहेको छ । सिटिजन्स्को १०.५६, मेगाको १०.१९, कुमारीको १०.६८, माछापुच्छेको १०.५६, एनसीसीको १०.७७, एनएमबीको १०.३३ सेन्चुरीको १०.४५ रहेको छ ।

बैंकहरुको औसत नाफा २० प्रतिशतभन्दा धेरैले बढेको छ । व्यवसाय विस्तारलाई तीव्र बनाएका केही कम्पनीले डेढ सय प्रतिशतसम्म नाफा बढाएका छन् । गत वर्षको चैतसम्ममा ३८ अर्ब ६ करोड नाफा गरेका वाणिज्य बैंकहरुले चालू आवको सोही अवधिमा ४५ अर्ब ६६ करोड नाफा कमाएका छन् ।

बैंकहरुको आफ्नो आधार ब्याजदरमा कर्जाको प्रकृति अनुसार बैंकहरुले न्यूनतम शून्य प्रतिशतदेखि अधिकतम् ८ प्रतिशतसम्म थप प्रिमियम जोडेर कर्जाको ब्याज हिसाब गर्ने गर्दछन् ।

कुन बैंकको आधार दर कति ?

बैंक	आधार दर (२०७६ असोज)
राष्ट्रिय वाणिज्य	६. ६०
कृषि विकास	१०. १८
नेपाल बैंक	७. ८४
नविल	७. ९४
इन्भेष्टमेन्ट	८. ४८
प्रभु	९. २४
एनआइसी एसिया	९. ५१
एनएमबि	१०. ३३
हिमालयन	८. ९३
एभरेष्ट	८. ५२
ग्लोबल आइएमई	९. ४४
सानिमा	९. २१
प्राइम कमर्सियल	९. ६७
एसबिआई	९. ९४
स्टान्डर्ड चार्टड	७. ६३
माछापुच्छ्रे	१०. ५६
सनराइज	९. ९७
सिद्धार्थ बैंक	१०. ०२
बैंक अफ काठमाण्डू	१०. ०२
नेपाल बंगलादेश	९. ८७
लक्ष्मी	१०. २४
मेगा	१०. १९
सिटिजन्स	१०. ५७
कुमारी	१०. ६८
सेन्चुरी	१०. ४५
जनता	१०. १३
एनसिसी	१०. ७७
सिभिल	११. ११