तरलता अभाव हुँदै गएपछि नेपाल राष्ट्र बैंकले ३० अर्ब रुपियाँ बैंकिङ प्रणालीमा पठाउने

भाद्र २४, काठमाडौं। चरम तरलता अभाव हुँदै गएपछि नेपाल राष्ट्र बैंकले १४ दिनको लागि ३० अर्ब रुपियाँ बैंकिङ प्रणालीमा पठाउने भएको छ । राष्ट्र बैंकले रिपोमार्फत् उक्त रकम बजारमा पठाउन लागेको हो।

केन्द्रीय बैंकले यसअघि पनि २० अर्ब रुपियाँ बजारमा पठाएकोे थियो । बैंक तथा वित्तीय संस्थामा तरलता बढ्दै गएपछि आगामी असोज १ गतेदेखि ऋणको ब्याज पनि बढ्ने भएको छ । उता, राष्ट्र बैंकले २ अर्ब ६५ करोड रुपियाँ पनि बैंक तथा वित्तीय संस्थामा राख्ने भएको छ ।

राष्ट्र बैंकले जारी गरेको सूचनामा बैंकमा रहेको सुरक्षण कोष÷उपदान तथा पेन्सन कोषमा रहेको रकम क, ख र ग वर्गका वित्तीय संस्थाहरुमा राख्ने जनाएको छ । राष्ट्र बैंकले ३६६ दिनको मुद्दती निक्षेप लागि राखिने उक्त रकम वित्तीय संस्था फाइनान्स कम्पनीमा १३ करोड २५ लाख रुपियाँ, विकास बैंकमा ३९ करोड ७५ लाख रुपियाँ र वाणिज्य बैंकमा २ अर्ब १२ करोड रुपियाँ राख्ने जनाएको छ । मुद्दती निक्षेपका लागि आफ्नो वित्तीय संस्थामा राख्नका लागि वित्तीय संस्था सञ्चालन भएको २ वर्ष भएको हुन पर्ने, राष्ट्र बैंकले तोकेको न्युनताम पुँजीको कायम रहेको हुन पर्ने शर्त केन्द्र्रीय बैंकले राखेको छ । वित्तीय संस्थाहरुको निष्कृय कर्जा कुल कर्जा सापटीको ५ प्रतिशतभन्दा कम हुनपर्ने, रियल स्टेट कर्जा तोकिएको मापदण्डभन्दा कम हुन पर्ने पनि राष्ट्र बैंकको शर्त रहेको छ ।