निरीक्षकलाई ३ लाखसम्म जरिवानाको अधिकार

काठमाण्डौँ – तत्काल अनुगमनमा खटेको बजार निरीक्षण अधिकृतले उपभोक्ता ठगी गर्ने व्यवसायीलाई तीन लाख रुपैयाँसम्म जरिवाना गर्न पाउने भएको छ ।

उपभोक्ता संरक्षण ऐन २०५४ लाई परिमार्जन गरेर बनाइएको विधेयकमा यस्तो व्यवस्था गरिएको हो ।

आइतबारको मन्त्रिपरिषद् बैठकले उपभोक्ता संरक्षण ऐनलाई एकीकरण गर्न बनेको विधेयक २०७५ संसदमा पेश गर्नका लागि स्वीकृति दिएको छ ।

संसदबाट यो विधेयक पारित भएपछि ऐनका रूपमा कार्यान्वयनमा आउने छ ।

विधेयकमा उपभोक्ता ठग्ने व्यवसायीलाई बजार निरीक्षण अधिकृतले तत्काल फिल्डमा ३० हजारदेखि ३ लाख रुपैयाँसम्म जरिवाना र एक वर्ष कैद गर्नसक्ने व्यवस्था गरेको उद्योग, वाणिज्य तथा आपूर्ति मन्त्रालयका सहसचिव एवं प्रवक्ता नवराज ढकालले जानकारी दिए ।

उनले बजार व्यवस्थित र मर्यादित राखी उपभोक्ता अधिकार सुरक्षित गर्नका लागि पुरानो ऐनलाई सशोधन गरेर उपभोक्तामैत्री बनाइएको पनि बताए ।

यसअघि विभागलाई कारबाही गर्ने अधिकार थिएन ।

– कारोबार