बिहीबार थप २६७६ जनामा कोरोना संक्रमण पुष्टि, १७५७ जना निको, मृतकको संख्या बढ्दो क्रममा

काठमाडौं, ३१ असार । नेपालमा पछिल्लो २४ घण्टामा थप २ हजार ६७६ जनामा कोरोना भाइरसको संक्रमण पुष्टि भएको छ ।

बितेको २४ घण्टामा देशभर ८ हजार २५६ जनाको आरटी–पीसीआर गर्दा १७८२ जना र ४ हजार ५१२ जनाको एन्टिजेन परीक्षण गर्दा ८९४ जना गरी आज २ हजार ६७६ जनामा संक्रमण पुष्टि भएको हो । यो सँगै नेपालमा कोरोना भाइरसबाट संक्रमित हुनेको संख्या ६ लाख ६२ हजार ५७० जना पुगेको छ ।

नेपालमा पछिल्लो २४ घण्टामा कोरोना भाइरस संक्रमणका कारण ३३ जनाको मृत्यु भएको छ । यो सँगै नेपालमा कोरोना भाइरसको संक्रमणका कारण ज्यान गुमाउनेको संख्या ९ हजार ४६३ जना पुगेको छ । पछिल्लो केही दिनयता मृतकको संख्या पुनः दिनप्रतिदिन बढिरहेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा १ हजार ७५७ जना संक्रमित निको भएका छन् । यो सँगै नेपालमा कोरोना भाइरसको संक्रमणमुक्त हुनेको संख्या ६ लाख २६ हजार ४६८ जना पुगेको छ । यो कुल संक्रमितको ९४.६ प्रतिशत हो ।

हाल देशभर सक्रिय संक्रमितको संख्या २६ हजार ६३९ जना छ । मन्त्रालयका अनुसार हालसम्म नेपालमा ३४ लाख ४६ हजार ५८६ जनाको स्वाब (नमूना) परीक्षण गरिएको छ भने अहिले २६ हजार ६३९ जना आइसोलेसन र २९२ जना क्वारेन्टिनमा छन् ।