सांसदहरूले गरेको तोडफोड संसदीय मर्यादा विपरित भएको भन्दै कारबाही गर्न गगन थापाको माग

काठमाडौं, असोज २० – नेपाली कांग्रेसका नेता तथा केन्द्रीय सदस्य गगन थापाले सोमबार प्रदेश ५ मा आफ्नै सांसदहरूले गरेको तोडफोड संसदीय मर्यादा विपरित भएको भन्दै कारबाही गर्न माग गरेका छन्।

आज बिहान सामाजिक सञ्जाल फेसबुकमा प्रतिक्रिया दिँदै उनले घटनाको आत्मालोचना गर्दै कारबाही गरिनुपर्ने बताएका हुन्।

‘प्रदेश ५ को संसदभित्र प्रतिपक्षबाट हिजो भएको व्यवहार संसदीय मर्यादा र प्रतिष्ठा विपरित छ। संसदमा आफ्नो फरक मत राख्ने र सरकारको विरोध गर्ने अनेकन तरिका छन्। हिजोको तरिका संसदभित्र पूर्णत अवाञ्छनीय छ। हामीले यो घटनामा आत्मालोचना गर्दै गल्ती गर्नेलाई कारबाही पनि गर्नै पर्छ’ नेता थापाले फेसबुकमा लेखेका छन्।

प्रतिपक्षको भूमिकाबारे नेतृत्वले आफ्ना नेता कार्यकर्तालाई सिकाउन नसकेको बताउँदै नेता थापाले भने, ‘प्रतिपक्षले सरकारको जस्तोसुकै नाजायज हठकाविरुद्ध आवाज उठाउन पाउँछ, पाउनु पर्छ र आवाज उठाउने तरिका संसदीय अभ्यासभित्रै छ। प्रतिपक्षको भूमिका के–कस्तो हुने भन्नेमा हामीले आफ्ना नेता कार्यकर्तालाई सिकाउन नसकेकै हो।’

आवेग र आवेशमा गरिएका व्यवहारले प्रतिपक्षकै मुद्दालाई कमजोर पार्ने नेता थापाको तर्क छ। ‘प्रतिपक्षले आवेगमा विवेक गुमाउँदा सरकारको असंसदीय तथा निन्दनीय व्यवहारका विरुद्ध बोल्ने नैतिक बल पनि गुमाउनु पर्छ। नत्र मन्त्रीको “घिसारेर निकालिहाल्” को प्रतिकार यति कमजोर हुँदैन थियो। आवेग र आवेशमा गरिएको व्यवहारले प्रतिपक्षकै मुद्दालाई कमजोर पार्छ भन्ने कुरा बुझौँ’ थापाले फेसबुकमा लेखेका छन्।