२४ घण्टामा थप ३१२२ जनामा कोरोना भाइरस संक्रमण पुष्टि, २८ जना संक्रमितको मृत्यु

काठमाडौं, वैशाख १२ – नेपालमा पछिल्लो २४ घण्टामा कोरोना भाइरसका ३ हजार १२२ जना नयाँ संक्रमित थप भएका छन् । बितेको २४ घण्टामा देशभर ९ हजार २९२ जनाको आरटी–पीसीआर गर्दा ३ हजार ३२ जना र ७८६ जनाको एन्टिजेट परीक्षण गर्दा ९० जनामा संक्रमण पुष्टि भएको हो ।

यो सँगै नेपालमा कोरोना भाइरसबाट संक्रमित हुनेको संख्या ३ लाख ११९ जना पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ४५० जना संक्रमित निको भएर अस्पतालबाट डिस्चार्ज भएका छन् । यो सँगै नेपालमा कोरोना भाइरसको संक्रमण निको हुनेको संख्या २ लाख ७७ हजार ५७३ जना पुगेको छ ।

पछिल्लो २४ घण्टामा २८ जना संक्रमितको मृत्यु भएको छ । यो सँगै हालसम्म नेपालमा कोरोना भाइरसको संक्रमणबाट मृत्यु हुनेको संख्या ३ हजार १६४ जना पुगेको छ ।

हाल देशभर सक्रिय संक्रमितको संख्या १९ हजार ३८२ जना छ ।

मन्त्रालयका अनुसार हालसम्म नेपालमा २४ लाख ५ हजार १७ जनाको पीसीआर विधिबाट स्वाब परीक्षण गरिएको छ भने अहिले १९ हजार ३८२ जना आइसोलेसन र ६९ जना क्वारेन्टिनमा छन् ।