बलात्कृत महिला न्याय खोज्दै माईतिघर

जहाँ जहाँ जान्छ न्यायालय त्यतैत्यतै हामी

एउटी बलात्कारको सिकार भएकी महिला आफ्नो न्यायको लागि भोक प्यास केहि नभनि आँसु पिउँदै न्याय माग्न माईतिघरको सेरोफेरोमा फन्का मारिरहेकी छिन् । “पीडित छु , न्याय पाएको छैन , न्याय खोज्दै सडकमै मृत्यु पर्खिदै दिन र रात कटाईरहेको छु तर मेरो प्राण जान्छ होला यो सरकारले न त मलाई न्याय दिन्छ न त आफ्नो न्यायको लाज छोप्छ अब त मलाई आसै भएन” भन्दै गुनासो गरिरहेकी हुन्छिन् । म नतमस्तक उनलाई सुनिरहेँ, हेरिरहेँ र उनको तस्वीर खिचेर फर्किएँ । उनलाई न्याय पाईन्छ भनेर आश्वासन दिन मनले मानेन कारण त्यही नै थियो पढेलेखेका बुद्धिजीवी र न्यायको वकालत गर्ने सबैले आफ्नो ज्ञान भुलेर उदण्ड जो मच्चाईरहेका छन् ।

“देशको आर्थिक , सामाजिक , शिक्षा ,स्वास्थ सबै क्षेत्रको बिकास ठप्प छ । मूल्य वृद्धी बढिरहेको र महंगी आकासिएको छ । गरिव सोझा सिधा जनता मर्कामा परिरहेका छन् । यस्तो बेलामा यी न्यायका मुर्तिलाई के भएको होला ?”  भन्दै माईतिघर मण्डलाको छेउमा प्यासेन्जर पर्खिरहेका एक ट्याक्सी चालक आक्रोश ब्यक्त गर्छन् ।

म स्वतन्त्र रुपमा स्वईच्छाले कलम चलाउने पत्रकार , शुक्रबार दिनभरी समाचार संप्रेषण गर्दैमा दिन बित्छ । न्यायालयको अराजक , अव्यावहारिक आन्दोलन र त्यहाँको गतिविधिले निकै नै मन कुडिएको छ ।

अघिपछि समाचार संकलन गर्न नहतारिने म शुक्रवार भने मलाई समाचार संकलन र संप्रेषण गर्न चटारो नै परेको थियो । कालो सेतो पट्टीको द्वन्द्वले अब अर्को कुन रङ्ग र कस्तो स्वभाव भएको पट्टीको जन्म गराउने हो भन्ने सोचाईले निकैबेर म सर्बोच्च अगाडिको काला कोटहरुका झुन्डलाई हेरेर टोलाउने मात्र होईन अलमल्ल नै परेको थिएँ ।
यो सब देखेर त्यहाँ उपस्तिथित धेरै पत्रकार , सेवाग्राही र सर्बसाधारण जनता अब न्यायालयमा न्याय हरायो, न्यायका लागि जाने कता ? भन्दै आत्तिएका थिए ।

बिहिवार एक वरिष्ठ अधिवक्ता रमन श्रेष्ठले पत्रकारलाई आरोप लगाउँदै दिईएको अभिव्यक्तिले भने पत्रकारहरुलाई झन् उर्जा दिएको हो कि भन्ने अनुमान गरिरहेको सहकर्मी बताउँछन् । अघिल्लो दिनको तुलनामा त्यहाँ पत्रकारको बाक्लो उपस्थिति नै थियो । न्यायालयमा न्याय गुम्दैन अब न्याय दिलाउने र न्याय बचाउने भनेकै पत्रकारको हो भन्दै सबै हौसिएका थिए । सर्वोच्चमा जति नै ठूलो भुकम्प आए पनि अलिकति पनि नहल्लीने बलियो खम्बा अझै बाँकी छ यो खम्बा जबसम्म जोगिन्छ तबसम्म न्याय मर्दैन भनिरहेका थिए । यो देखेर सर्बोच्चको न्याय खुम्चिएको जसरी खुम्चिएको मेरो मन भने खुसिले निरन्तर कर्ममा लागेको छ । हेरौँ अब न्यायालयमा न्यायले कुन मार्ग लिन्छ र हामिलाई कता डोराउँछ । जहाँ जहाँ जान्छ न्यायालय त्यतैत्यतै हामी ।