हिमालय एयरलाइन्सद्धारा काठमाडौं–छोङ्छिङ् सिधा उडान सुरु, चीनको गन्तव्य पाँच पुग्यो

काठमाडौं, माघ १० – हिमालय एयरलाइन्सले काठमाडौं–छोङछिङ उडान सुरु गरेको छ । चिनियाँ नयाँ वर्षको अवसर पारी कम्पनीले बिहीबारदेखि काठमाडौंबाट चीनको छोङछिङ उडान सुरु गरेको हो ।

छोङ्छिङ् जन गणतान्त्रि चीनको एक मनोरम पर्यटकीय शहर हो । नेपालबाट छोङ्छिङ् सिधा उडान सेवा भर्ने हिमालय एअरलाइन्स् नै पहिलो हवाई सेवा कम्पनी हो । सिधा हवाई सेवा शुरु भएसँगै आगामी दिनमा दुबै शहरमा पर्यटकीय आवागमनमा उल्लेख्य टेवा पुग्ने विश्वास लिइएको छ ।

विहिबार संस्कृति, पर्यटन तथा नागरिक उड्डयनमन्त्री योगेश भट्टराई, नेपालका लागि चिनियाँ राजदुत होउ यान्छी, हिमालय एयरलाइन्सका अध्यक्ष झोउ इयोङ, पर्यटन सचीव केदारबहादुर अधिकारीले संयुक्त रुपमा उडान शुभारम्भ गरे ।

यो सँगै एयरलाइन्सको चीनको उडान गन्तव्य पाँच पुगेको छ । यसअघि हिमालयले बेइजिङ, छाङ्सा, सेन्जेन, छोयाङ उडान भर्दै आएको छ । हिमालय एयरलाइन्स नेपाल र चीनको संयुक्त लगानी रहेको अन्तर्राष्ट्रिय उडान भर्ने निजी वायुसेवा कम्पनी हो ।