नाटक ‘आयोजना नम्बर १६०’ दमकमा मञ्चन

दमक । झापाको दमकमा नियमित नाटक मञ्चन गरिरहेको कदम थियटरले यसपटक नाटक ‘आयोजना नम्बर १६०’ प्रदर्शन गरिरहेको छ ।

५ असारदेखि कदम थियटरको पाइवाइला हिममा नाटक मञ्चन गरिरहेको हो । नाटक १५ असारसम्म मञ्चन हुने कदम थियटरका कला निर्देशक सिजन दाहालले जानकारी दिए । नाटक साँझ ५:१५ देखि नियमित मञ्चन हुँदै आएको छ ।

भारतीय नाटककार अजय शुक्लाको हिन्दी नाटक ‘ताजमहलका टेन्डर’ लाई नवीन भण्डारीले नेपालीमा रूपान्तरण गरेर यो नाटक कदममा मञ्चन गरिएको उनले बताए ।

नाटकमा सरकारी सुशासनलाई प्रश्न गरिएको छ । सरकारले कसरी हचुवाको भरमा आयोजना ल्याउँछ र कसरी अलपत्र पार्छ भन्ने देखाइएको दाहालले बताए । उनका अनुसार कर्मचारीतन्त्रले लोभमा फसेर कसरी सरकारी ढुकुटीमा राज गरिरहेका छन् भन्ने देखाएको छ । नाटक पूर्णतः कमेडी रहेको उनले बताए ।

नाटक ‘आयोजना नम्बर १६०’ मा एक जना सत्ता सञ्चालक र स्थानीय सरकार मानिएको कर्मचारीतन्त्रलाई गहिरो प्रश्न गरिएको छ ।

कदम थियटरमा मञ्चन भइरहेको नाटक ‘आयोजना नम्बर १६०’ मा बुङ छेङ, नवीन भण्डारी, नवीन ऊर्जा, रश्मि उप्रेती, पारुमा राई, पुकारजङ्ग क्षेत्री, रोशन मुर्मु, सुदीप क्षेत्री, सञ्जय मुडियारी र पुजन खरेलले अभियनय गरेका छन् । यो नाटक यिनै १० कलाकारले निर्देशन गरेका हुन् । लाइटमा आयुष भण्डारी छन् ।