कुलिङ पिरियडमाथिको बद्मासीबारे कता घुम्दैछ शङ्काको सुई ? यस्तो छ सांसदहरूको धारणा

काठमाडौँ । प्रतिनिधि सभाको राज्य व्यवस्था तथा सुशासन समितिको आकस्मिक बैठकमा कुलिङ पिरियडमा भएको हेरफेरको विषयमा सांसदहरु आक्रोशित भएका छन् ।

समितिको बैठकमा माओवादी केन्द्रका प्रमुख सचेतक हितराज पाण्डेले कुलिङ पिरियडमा भएको हेरफेरको विषय छानबिन गर्नुपर्ने र समितिले राष्ट्रिय सभामा सच्याउने प्रक्रिया अगाडि बढाउनुपर्ने बताए ।

छानबिन समिति राज्यव्यवस्था समितिबाट मात्र गठन गर्न नहुने बताउँदै पाण्डेले समिति सभापतिसहित छानबिनको दायरामा आउनुपर्ने र सभापतिले को–को बसेर परिवर्तन गरेको हो जानकारी दिनुपर्ने बताए । उनले संसदबाट उच्चस्तरीय छानबिन समिति गठन गर्नुपर्ने र कुलिङ पिरियड जसरी पनि लागू हुनुपर्ने बताए ।

त्यस्तै, कांग्रेसकी सांसद सरिता प्रसाईंले आफूहरुले मन्त्रालयका र समितिका सचिवलाई विश्वास गरेर गल्ती नगरेको भन्दै संसदलाई ठुलो विश्वासघात भएको प्रतिक्रिया दिएकी छन् । उनले संसदलाई भएको यो विश्वासघातलाई यत्तिकै छोड्न नहुने भन्दै छानबिन गरेर दोषीलाई कारबाही गर्नुपर्ने बताएकी छन् ।

त्यसैगरी समितिमा नेकपा एमालेका सांसद पदम गिरीले राज्य व्यवस्था समितिका सभापति र सचिवले राजीनामा दिनुपर्ने सुझाव दए ।

त्यस्तै, राप्रपाका सांसद बुद्धिमान तामाङले यस घटनाले संसद जालझेल गर्ने थलो बनेको बताउँदै समितिको हरेक बैठकमा कुलिङ पिरियड राख्नुपर्ने भनेर समितिका सभापति रामहरि खतिवडाले जोड दिएर भनिरहेकाले उनले जानीजानी यसमा हस्ताक्षर गरेको हो भन्ने आफूलाई विश्वास नरहेको प्रतिक्रिया दिए ।

समितिको बैठकमा अधिकांश सांसद फेरफेर गरेका समिति र कानुन मन्त्रालयका कर्मचारीहरुप्रति आक्रोशित भएका थिए । सांसदहरुले यस प्रकरणमा संसद, सांसदहरुलाई विश्वासघात भएको बताएका थिए ।