नेपाल बैंकका नाफा १८३.०४ प्रतिशतले बढ्यो, अन्य सूचक कस्ता ?

काठमाडौं । नेपाल बैंकले चालु आर्थिक वर्षको दोस्रो त्रैमासको वित्तीय विवरण सार्वजनिक गरेको छ ।

बैंकले सार्वजनिक गरेको विवरण अनुसार पुस मसान्तसम्म नेपाल बैंकले १ अर्ब ३० करोड ४८ लाख ५२ हजार रुपैयाँ नाफा आर्जन गरेको छ ।

यो नाफा गत आवको सोही अवधिको तुलनामा १८३.०४ प्रतिशतले धेरै हो । गत आवको सोही अवधिमा बैंकले ४६ करोड १० लाख १७ हजार रुपैयाँ नाफा आर्जन गरेको थियो ।

यो अवधिमा बैंकको खुद ब्याज आम्दानी घटेको छ भने सञ्चालन नाफा बढेको छ । यो अवधिमा बैंकको इम्पेरमेन्ट चार्ज घटेको छ ।

बैंकको खुद ब्याज आम्दानी ३.९७ प्रतिशतले घटेर ४ अर्ब ४४ करोड २९ लाख १५ हजार रुपैयाँ रहेको छ । यस्तै सञ्चालन नाफा भने ३९४.६४ प्रतिशतले बढेर २ अर्ब ६ करोड १५ लाख ६ हजार रुपैयाँ पुगेको छ ।

गत आवको दोस्रो त्रैमासमा २ अर्ब ५२ करोड ७४ लाख ४२ हजार रुपैयाँ रहेको इम्पेरमेन्ट चार्ज चालु आवको सोही अवधिमा घटेर ४७ करोड ९९ लाख २९ हजार रुपैयाँ रहेको छ । यसले नाफा बढाउन सहयोग गरेको छ ।

पुस मसान्तसम्म बैंकको वितरणयोग्य नाफा ९१ करोड ४९ लाख २३ हजार रुपैयाँ ऋणात्मक छ । वितरणयोग्य प्रतिशेयर आम्दानी १२ रुपैयाँ ४५ पैसा ऋणात्मक छ ।

बैंकको प्रतिसेयर आम्दानी ११ रुपैयाँ ४९ पैसाले बढेर १७ रुपैयाँ ७६ पैसा पुगेको छ भने प्रतिसेयर नेटवर्थ २६२ रुपैयाँ ४३ पैसा छ । १४ अर्ब ६९ करोड ४० लाख २२ हजार रुपैयाँ चुक्ता पुँजी रहेको बैंकको जगेडा कोषमा २३ अर्ब ८६ करोड ७४ लाख ३५ हजार रहेको छ ।