लिभरपुललाई वल्भ्सको चुनौती

काठमाडौं, मंसिर २१ – – इंग्लिस प्रिमियर लिगमा आज राति लिभरपुलले घरेलु मैदानमा वल्भ्सको सामना गर्दैछ । खेल नेपाली समयअनुसार एनफिल्डमा राति १ बजे हुनेछ ।

घरेलु मैदानमा हुने खेलमा लिभरपुल वल्भ्समाथि सहज जितको लक्ष्यसहित मैदान उत्रनेछ । लिचरपुलसँग साडियो माने, मोहम्मद सलाह र रोबर्टो फिर्मिनो टोलीसँग हुनेछ । वल्भ्सकै पुवै फरवार्ड डिएगो जोटा पनि टोलीसँग रहँदा जोर्डन हेन्डरसन, जर्जिन्हो वाइनाल्डम, कर्टिस जोन्स, एन्ड्रिउ रोबर्टसन, जोए मटिप, फाविन्हो, र निको विलियम्स टोलीमा हुनेछ ।

पहिलो रोजाईका गोलरक्षक एलिसन बेकर चोटसँग जुधिरहँदा च्याम्पियन्स लिगमा आयाक्सविरुद्ध उच्च प्रदर्शन गरेका युवा गोलरक्षक काओइम केल्लेहरलाई प्रशिक्षक योर्गेन क्लोपले अवसर दिन सक्नेछ ।

यता, वल्भ्स पनि लिभरपुलविरुद्ध अंक खोस्ने दाँउमा हुनेछ । वल्भ्ससँग ड्यानियल पोडेन्स, एडमा ट्राओरे, पेड्रे नेटो, मार्कल, रुवेन नेभेस, नेल्स सेमेडो र रुइ प्याट्रिसियोजस्ता स्तरीय खेलाडीको साथ रहेको छ ।

लिभरपुलको २१ तथा वल्भ्सको १७ अंक छ । लिभरपुल वल्भ्ससँग पछिल्लो तीन खेलमा अपराजित छ । त्यसअघि २०१९ जनवरीमा भएको एफए कपमा लिभरपुल २–१ ले पराजित भएको थियो ।