प्रधानमन्त्रीबाट हटाउन ओलीकाे चुनौती

काठमाडौं, चैत २१ – प्रधानमन्त्री केपी शर्मा ओलीले आफूलाई हटाउन चुनौती दिएका छन् । शनिबार बालुवाटारमा आयोजित १६५ वटा सडक शिलान्यास कार्यक्रममा बोल्दै प्रधानमन्त्री ओलीले सरकारलाई दिएको समर्थन फिर्ता लिन माओवादीलाई चुनौती दिए ।

‘समर्थन फिर्ता लिइदेऊ भन्छु, त्यो पनि लिदैन,’ माओवादीप्रति लक्षित गर्दै उनले भने, ‘अनि राजीनामा माग्छ । राजीनामा त आइहाल्छ नि समर्थन फिर्ता गर न । समर्थन फिर्ता पनि गर्दैन राजीनामा माग्छन् ।’

दिनैपिच्छे आफ्नो राजीनामा मागिएको प्रति टिप्पणी गर्दै प्रधानमन्त्री ओलीले समर्थन फिर्ता लिए राजीनामा दिने बताए । ‘आजमात्रै हो र राजीनामा मागेको ? माग्या माग्यै छन् त ? माग्यैपिच्छे म कसरी दिनसक्छु ? एक दिन एउटाले माग्या हुन्छ । एउटाले मात्रै माग्या छ र ? एउटाले माग्दैन, दुईटाले माग्दैन । एक दिन माग्दैन, दुई दिन माग्दैन । माग्या माग्यै छ त ? माग्यैपिच्छे म कसरी दिनसक्छु भन्या । ए बाबा हटाउन न त’ उनले भने ।