जलविद्युत् क्षेत्रकी युवा उद्यमी अभिज्ञा मल्ललाई ‘कर्पोरेट वमन अन्टरप्रेनर अवार्ड’

काठमाडौं । कर्पोरेट मिडिया ग्रुपले जलिविद्युत् क्षेत्रमा स्थापित युवा उद्यमी तथा हाइ हिमालय हाइड्रो कन्स्ट्रक्सनकी निर्देशक अभिज्ञा मल्ललाई ‘कर्पोरेट वमन अन्टरप्रेनर अवार्ड’ प्रदान गरेको छ ।

१८औँ संस्करणको ‘कर्पोरेट बिजनेश समिट एण्ड अवार्ड, २०२६’ अन्तर्गत उनलाई सो अवार्ड प्रदान गरिएको हो । ईश्वर लाल प्रतिष्ठानको सहकार्यमा कर्पोरेट मिडिया ग्रुपले बिहीबार काठमाडौंस्थित होटेल र्‍याडिसनमा आयोजना गरेको विशेष समारोहमार्फत प्रतिनिधसभा राज्य व्यवस्था तथा सुशासन समितिका सभापति हरि ढकालले मल्ललाई सो अवार्ड प्रदान गरे ।

ऊर्जा क्षेत्रमा निजी लगानी विस्तार, महिला उद्यमशीलता र राष्ट्रिय आत्मनिर्भरतामा पुर्‍याएको विशिष्ट योगदानको कदरस्वरूप उनलाई सो अवार्ड प्रदान गरिएको कर्पोरेट मिडिया ग्रुपका अध्यक्ष उज्वल जंग शाहले जानकारी दिए ।

अभिज्ञा मल्ल नेपालको ऊर्जा तथा जलविद्युत् क्षेत्रकी एक दूरदर्शी र स्थापित युवा उद्यमी हुन् । हाल युनियन हाइड्रोपार पब्लिक लिमिटेडकी अध्यक्ष तथा हाइ हिमालय हाइड्रो कन्स्ट्रक्सनकी निर्देशक रहेकी उनी विभिन्न जलविद्युत् परियोजनाहरूमा विभिन्न भूमिकामा संलग्न छिन् ।

हालै नेपाल उद्योग वाणिज्य महासंघ (एफएनसीसीआई) को केन्द्रीय कार्यकारिणी सदस्य निर्वाचित उनी इप्पानकी नवनिर्वाचित सचिव र एासीए नेपालकी वैकल्पिक बोर्ड सदस्य समेत हुन् । उनले आफ्नो नेतृत्वदायी भूमिकाहरूबाट नीतिगत विकासमा योगदान पुर्‍याउँदै आएकी छिन् ।

कार्यक्रममा ‘कर्पोरेट एक्सिलेन्स’, ‘बैंकिङ, इन्स्योरेन्स एण्ड फाइनान्स’, ‘कर्पोरेट इन्डष्ट्री लिडरसिप’, ‘कर्पोरेट बिजनेश लिडरसिप’ र ‘लाइफटाइम एचिभमेन्ट’ सहित पाँचवटा विधामा कूल २९ वटा अवार्ड प्रदान गरिएको अध्यक्ष शाहले जानकारी दिए । नेपालको निजी क्षेत्र, बैंकिङ, बीमा, उद्योग, स्वास्थ्य, ऊर्जा तथा उद्यमशीलता क्षेत्रमा उल्लेखनीय योगदान पुर्‍याउने व्यक्ति तथा संस्थाहरूलाई सम्मान गर्ने उद्देश्यले विगत १८ वर्षदेखि ‘कर्पोरेट बिजनेश अवार्ड’ आयोजना गर्दै आएको उनको भनाइ छ ।

कार्यक्रममा अवार्ड वितरणसँगै देशको वर्तमान आर्थिक अवस्था, लगानीको वातावरण, निजी क्षेत्रले भोगिरहेका चुनौती तथा आर्थिक पुनरुत्थानका सम्भावनाबारे पनि छलफल गरिएको थियो । यस्तै, अर्थतन्त्रलाई चलायमान बनाउन निजी क्षेत्रको भूमिका, लगानी विस्तार, रोजगारी सिर्जना तथा आर्थिक सुधारका विषयमा समेत छलफल गरिएको थियो ।

कार्यक्रममा प्रतिनिधिसभाअन्तर्गत राज्य व्यवस्था तथा सुशासन समितिका सभापति हरि ढकाल, सङ्घीय सांसद, अर्थशास्त्री, उद्योगी–व्यवसायी तथा विभिन्न क्षेत्रका सरोकारवालाको सहभागिता रहेको थियो । साथै, देशभरका उद्योगी–व्यवसायी, बैंक तथा वित्तीय संस्था, बीमा कम्पनी, स्वास्थ्य संस्था, ऊर्जा क्षेत्र तथा अन्य व्यावसायिक क्षेत्रका प्रतिनिधिहरूको उल्लेख्य उपस्थिति रहेको थियो ।

यो पनि पढ्नुहोस्–