वैदेशिक रोजगार : युद्धका कारण श्रम स्वीकृति रोकिएकै मुलुकतर्फ झण्डै ३० हजार नेपाली उडे

कामको खोजी गर्दै फागुनमा विदेसिएका ५२ हजार ९४४ जनामध्ये २९ हजार ६८० जना नेपाली सुरक्षा चिन्ताग्रस्त मुलुकतर्फ उडेका हुन्

काठमाडौं । स्वदेशमा रोजगारीको अवसर नभएको भन्दै फागुनमा ५२ हजार ९४४ जना नेपाली युवायुवती वैदेशिक रोजगारीमा गएका छन् ।

विदेसिएकामध्ये ४६ हजार ४५२ जना पुरुष र ६ हजार ४९२ जना महिला छन् । यसमध्ये पनि इजरायल–अमेरिका र इरानबीच भइरहेको युद्धका कारण श्रम स्वीकृति रोकिएका देशमा जानेको सङ्ख्या सर्वाधिक छ ।

जारी त्रिदेशीय युद्धका कारण हाल सरकारले साउदी अरेबिया, संयुक्त अरब इमिरेट्स (यूएई), कतार, कुवेत, बहराइन, ओमान, इराक, यमन, जोर्डन, लेबनान, टर्की र इजरायलमा श्रम स्वीकृति स्थगन गरेको छ । गत फागुन १७ गते श्रम, रोजगार तथा सामाजिक सुरक्षा मन्त्रालयले एक सूचना जारी गर्दै मन्त्रीस्तरीय निर्णयबाट उल्लेखित मुलुकका लागि श्रम स्वीकृति स्थगन गरेको थियो ।

तर, फागुन महिनामा विदेसिएकामध्ये झण्डै ३० हजार नेपाली युवायुवती ती देशतर्फ उडेका छन् । कामको खोजी गर्दै फागुनमा विदेसिएका ५२ हजार ९४४ जनामध्ये २९ हजार ६८० जना नेपाली सुरक्षा चिन्ताग्रस्त मुलुकतर्फ उडेका हुन् । त्यसमध्ये २६ हजार ३१४ जना पुरुष र तीन हजार ३६६ जना महिला छन् ।

वैदेशिक रोजगार विभागका अनुसार श्रम स्वीकृति स्थगन गरिएकामध्ये सबैभन्दा बढी युएईमा १६५२ जना महिलासहित ११ हजार ४९२ जना, कतारमा ५९९ जना महिलासहित ६ हजार ७५७ र साउदी अरेबियामा ३९ जना महिलासहित ६ हजार २२५ जना गएका छन् । विभागले हालै सार्वजनिक गरेको मासिक प्रतिवेदनमा यमनको भने कुनै विवरण टेटिएन ।

विस्तृत विवरण तालिकामा हेर्नुहोस्–

S.N.	Country	Male	Female	Total
1	Saudi Arabia	6186	39	6225
2	UAE	9840	1652	11492
3	Qatar	6158	599	6757
4	Kuwait	2546	500	3046
5	Bahrain	640	130	770
6	Oman	638	113	751
7	Iraq	29	1	30
8	Jordan	23	188	211
9	Lebanon	1	1	2
10	Turkey	177	41	218
11	Israel	76	102	178
12	yemen	No Data	No Data	No Data
	Total	26314	3366	29680

फागुनमा सबैभन्दा बढी मलेसियामा १२ हजार ६०१ जना, यूएईमा ११ हजार ४ सय ९२, कतारमा ६ हजार ७ सय ७५ जना, साउदी अरेबियामा ६ हजार २ २५ जना श्रम स्वीकृति लिएर गएका छन् । फागुनको दोस्रो सातासम्म श्रम स्वीकृति लिएकाहरु वैदेशिक रोजगारमा गएकाले फागुनमा जानेको संख्या पनि उल्लेख्य नै देखिएको हो ।

इजरायल–अमेरिका र इरानबीच युद्ध सुरू भएको आज सोमबार १७औँ दिन भयो । यसबीचमा इरानले खाडी तथा अन्य देशमा रहेका अमेरिकी सैन्य बेस क्याम्पमा मिसाइल तथा ड्रोन आक्रमण गरिरहेको छ । त्यसकारण यूएई, कतार, साउदी अरेयिबा, ओमान, बहराइनलगायत देशमा कार्यरत नेपालीहरूको सुरक्षा चिन्ता बढिरहेको छ ।