बङ्गलादेशमा फेब्रुअरीमा संसदीय चुनाव र जनमत सङ्ग्रह घोषणा

काठमाडौं । बङ्गलादेशको अन्तरिम सरकारका प्रमुख सल्लाहकार मोहम्मद युनुसले फेब्रुअरीको मध्यमा संसदीय चुनाव र जुलाई बडापत्रमा जनमत सङ्ग्रह गर्ने घोषणा गरेका छन् ।

आज दिउँसो राष्ट्रलाई टेलिभिजनमार्फत् सम्बोधन गर्दै युनुसले जुलाई बडापत्र कार्यान्वयन आदेशमा जनताको मत माग्ने जनमत सङ्ग्रहका लागि एउटा प्रश्न हुने बताए ।

विवादित मागहरूलाई सन्तुलनमा राख्न युनुसले १०० सदस्यीय माथिल्लो सदन राष्ट्रिय चुनावमा प्रत्येक दलको मतको हिस्साको आधारमा समानुपातिक प्रतिनिधित्वमार्फत् गठन गरिने समेत घोषणा गरेका छन् ।

उनले कार्यान्वयन आदेश जारी गर्ने काम पहिले नै अन्तिम चरणमा रहेको र राजपत्रको अधिसूचनाको लागि पर्खिरहेको बताए ।

उनले जनमत सङ्ग्रहका लागि मतपत्रसँगै मतदाताहरूलाई हो वा होइन उत्तरमा चार प्रश्नहरूको उत्तर दिन आग्रह गरिने बताए । यदि बहुमत मतदाताहरूले हो मतदान गरे भने संविधान संशोधन गर्न बङ्गलादेशमा संवैधानिक सुधार परिषद् गठन गरिने छ । जुलाई बडापत्र देशको राजनीतिक र संस्थागत संरचना सुधार गर्ने उद्देश्यले गरिएको थियो ।

बङ्गलादेशका अधिकांश राजनीतिक दलहरूले अक्टोबरमा बडापत्रमा हस्ताक्षर गरेका थिए, तर गत वर्षको आन्दोलनका नेताहरू र चार वामपन्थी दलहरू मिलेर बनेको राष्ट्रिय नागरिक पार्टी (एनसीपी) ले यसलाई बहिष्कार गरेको थियो । एनसीपीले बडापत्रमा गरिएका वाचाहरू कार्यान्वयन गर्न कानुनी रूपरेखा वा आवश्यक ग्यारेन्टीको अभाव रहेको तर्क गरिरहेको छ ।