प्रधानमन्त्रीसँग मेरो सम्बन्ध बिग्रिएको भनेर गलत प्रचार गरियो : अर्थमन्त्री

काठमाडौं । अर्थमन्त्री विष्णु पौडेलले प्रधानमन्त्री केपी शर्मा ओलीसँग आफ्नो सम्बन्ध बिग्रिएको भन्ने गलत प्रचार गरिएको भन्दै आपत्ति जनाएका छन् ।

आइतबार पीजे क्लबले बबरमहलस्थित आर्ट ग्यालरीमा आयोजना गरेको फोटो प्रदर्शनीमा अर्थमन्त्री पौडेलले प्रधानमन्त्रीसँग आफ्नो सम्बन्ध बिग्रिएको भनेर प्रचार भएकोमा आपत्ति जनाएका हुन् ।

उनले भने, ‘यसमा सच्चाइको एउटा सानो अंश पनि छैन । त्यस्तो धन्दामा रमाउने साथीहरूलाई मेरो आग्रह छ, मनको लड्डु घिउसँग खानुहोस् । योभन्दा थप भन्नुपर्ने केही छैन । यस्तो खालको अविश्वासनीय समाचारले कसैलाई पनि फाइदा गर्दैन । ’

उनले आफूहरू सरकारमा आउँदा समस्या र चुनौतीको चाङ रहेको भन्दै त्यसैलाई पन्छाउने कोसिसमा सरकार रहेको बताए । अर्थतन्त्रको तरलता अहिले सहजताको अवस्थामा ल्याई अर्थतन्त्रलाई अझ गतिशील बनाउने दिशामा सरकार रहेको उनको भनाइ छ ।

उनले भने, ‘हामी सरकारमा आउँदै गर्दा विरासतमा केही बोझहरू थिए । समस्याको चाङ थियो । त्यसलाई पन्छाउँदै जाने काम गरिराखेका छौं । क्रमशः विद्यमान चुनौतीहरूलाई, समस्याहरूलाई बिस्तारै बिस्तारै पन्छाउने कोसिस गरिरहेका छौं । हिजो बैंकको ब्याजदर बढी भयो भन्ने गुनासो थियो, सिंगल डिजिटमा झार्न सफल भएका छौं । तरलता सहजताको अवस्थामा छ । हामी उत्पादकत्व वृद्धि, रोजगारी सिर्जनालगायतका क्षेत्रमा काम गरिरहेका छौं । अर्थतन्त्रलाई अझ गतिशील बनाउने दिशामा हामी लागेका छौं ।’