निजी क्षेत्रको मनोबल बढाउन सीएनआईको आग्रहमा अर्थमन्त्रीले भने– आशाको दियो बाल्नेछु

काठमाडौं । उपप्रधान तथा अर्थमन्त्री विष्णु पौडेलले निजी क्षेत्रको मनोबल बढाउने आफूले आशाको दियो बाल्ने प्रयास गर्ने बताएका छन् ।

हिजो बिहीबार मन्त्री पौडेललाई बधाई तथा शुभकामना व्यक्त गर्दै सीएनआईले आर्थिक अवस्था र सुधारका विषयमा आफ्ना सुझाव दिनेक्रममा अर्थमन्त्री पौडेलले पछिल्लो राजनीतिक समीकरणलाई समेत हेरेर आशावादी भइदिन निजी क्षेत्रलाई आग्रह गर्दै केही नयाँ गरेरै छोड्ने प्रतिबद्धता व्यक्त गरेका हुन् ।

‘प्रधानमन्त्री चौथो पटक भूतपूर्व प्रधानमन्त्रीको फोटो टाँस्न आउनुभएको होइन । समस्या देखेरै त्यो समाधानका लागि यो सरकार आएको हो,’ अर्थमन्त्री पौडेलले भने, ‘अर्थतन्त्रमा आशाको दियो बाल्ने प्रयास हुनेछ ।’

उनले नीतिको स्थिरता र कार्यान्वयनको स्थायित्व आवश्यक रहेकाले यसैमा केन्द्रित भई सरकारले काम गर्ने बताएका छन् । समस्या मात्र नभई समाधानका लागि निजी क्षेत्रसँग सँगै बसेर छलफललाई केन्द्रित गर्ने समेत उनको भनाइ थियो ।

उपप्रधान तथा अर्थमन्त्री विष्णु पौडेल र नेपाल उद्योग परिसंघ (सीएनआई) बीचको छलफलका क्रममा सीएनआईले आर्थिक अवस्था र सुधारका विषयमा आफ्ना सुझाव दिएको छ ।

परिसंघको तर्फबाट सफल कार्यकालको शुभकामना दिँदै अध्यक्ष राजेश कुमार अग्रवालले विगत तीन वर्षदेखि शिथिल अर्थतन्त्रलाई चलायमान बनाउन निजी क्षेत्रको बनोबल बढाउनुपर्नेमा जोड दिए । उत्पादनशील र निर्माण क्षेत्र बढी प्रभावित हुँदा बाह्य क्षेत्र उत्साहजनक भए पनि आन्तरिक अर्थतन्त्र अझै समस्यामा रहेको उनको भनाइ थियो ।

विगत तीन वर्षदेखि उद्योगहरू ३०/४० प्रतिशत क्षमतामा सञ्चालन भइरहेको र समग्र बजार मागमा सङ्कुचन आउँदा अर्थतन्त्र चलायमान हुन नसकेको भन्दै उनले विगतका सङ्कुचनकारी मौद्रिक नीतिले अर्थतन्त्र विस्तार हुन नसकेको स्पष्ट गरे । चालुपूँजी कर्जा मार्गदर्शन र पूँजीको वर्गीकरण मार्गदर्शनका कारण उत्पादनशील क्षेत्र र निर्माण क्षेत्र बढी प्रभावित भएकाले यी दुई मार्गदर्शन खारेज हुनुपर्नेमा अध्यक्ष अग्रवालले जोड दिएका छन् ।

परिसंघले अर्थतन्त्रलाई चलायमान बनाउन समग्र माग बढ्ने नीति लिनुपर्ने, पूँजीगत खर्च बढाउन सुनिश्चितता प्रदान गर्नुपर्नेमा जोड दिएको छ ।

सो अवसरमा परिसंघका निर्वतमान अध्यक्ष विष्णुकुमार अग्रवाल, पूर्व अध्यक्ष हरिभक्त शर्मा, उपाध्यक्षहरू वीरेन्द्रराज पाण्डे, राजबहादुर शाह, रोहित गुप्ता, अमित मोर, भीम घिमिरे, गभर्निङ्ग काउन्सिल सदस्यहरू शिवरतन शारडा, योगेश्वरलाल श्रेष्ठ, बालकृष्ण श्रेष्ठ, राष्ट्रिय परिषद् सदस्य विदुषी राणा, महानिर्देशक डा. घनश्याम ओझालगायतले मन्त्री पौडेलको सफल कार्यकालका लागि शुभकामना दिए ।

यो पनि पढ्नुहोस्–

विद्यमान समस्या सुल्झाउन र केही परिवर्तन गर्न नयाँ सरकार आएको हो, मौद्रिक नीति कठोर हुनुहुँदैन : प्रधानमन्त्री