सीएनआईका अध्यक्ष वीरेन्द्र राज पाण्डेलाई ‘कर्पोरेट बिजनेश लिडर्स अवार्ड’

वीरेन्द्र राज पाण्डे नेपालको निजी क्षेत्र, उद्योग र पूर्वाधार विकासमा तीन दशकभन्दा लामो समयदेखि सक्रिय दूरदर्शी कर्पोरेट नेतृत्वकर्ता हुन्

काठमाडौं । कर्पोरेट मिडिया ग्रुपले नेपाल उद्योग परिसंघ (सीएनआई) का अध्यक्ष वीरेन्द्र राज पाण्डेलाई ‘कर्पोरेट बिजनेश लिडर्स अवार्ड, २०२६’ प्रदान गरेको छ ।

१८औँ संस्करणको ‘कर्पोरेट बिजनेश समिट एण्ड अवार्ड, २०२६’ अन्तर्गत उनलाई सो अवार्ड प्रदान गरिएको हो ।

ईश्वर लाल प्रतिष्ठानको सहकार्यमा कर्पोरेट मिडिया ग्रुपले बिहीबार काठमाडौंस्थित होटेल र्‍याडिसनमा आयोजना गरेको विशेष समारोहमार्फत प्रतिनिधसभा राज्य व्यवस्था तथा सुशासन समितिका सभापति हरि ढकालले अध्यक्ष पाण्डेलाई सो अवार्ड प्रदान गरे ।

वीरेन्द्र राज पाण्डे नेपालको निजी क्षेत्र, उद्योग र पूर्वाधार विकासमा तीन दशकभन्दा लामो समयदेखि सक्रिय दूरदर्शी कर्पोरेट नेतृत्वकर्ता हुन् । नेपाल उद्योग परिसंघका अध्यक्ष रहेका उनी नेपाल आदर्श निर्माण कम्पनीका प्रबन्ध निर्देशक समेत हुन् ।

इन्जिनीयरिङ र व्यवस्थापनमा स्नातकोत्तर गरेका पाण्डेले औद्योगिक विकास, ‘मेक इन नेपाल’ अभियान र नीतिगत सुधारमा महत्वपूर्ण भूमिका खेलेका छन् । पूर्वाधार विकास र आर्थिक रूपान्तरणमा पुर्‍याएको विविध योगदानको उच्च कदरस्वरुप उक्त अवार्ड प्रदान गरिएको कर्पोरेट मिडियाका अध्यक्ष उज्वल जंग शाहले जानकारी दिए ।

कार्यक्रममा ‘कर्पोरेट एक्सिलेन्स’, ‘बैंकिङ, इन्स्योरेन्स एण्ड फाइनान्स’, ‘कर्पोरेट इन्डष्ट्री लिडरसिप’, ‘कर्पोरेट बिजनेश लिडरसिप’ र ‘लाइफटाइम एचिभमेन्ट’ सहित पाँचवटा विधामा कूल २९ वटा अवार्ड प्रदान गरिएको अध्यक्ष शाहले जानकारी दिए । नेपालको निजी क्षेत्र, बैंकिङ, बीमा, उद्योग, स्वास्थ्य, ऊर्जा तथा उद्यमशीलता क्षेत्रमा उल्लेखनीय योगदान पुर्‍याउने व्यक्ति तथा संस्थाहरूलाई सम्मान गर्ने उद्देश्यले विगत १८ वर्षदेखि ‘कर्पोरेट बिजनेश अवार्ड’ आयोजना गर्दै आएको उनको भनाइ छ ।

कार्यक्रममा अवार्ड वितरणसँगै देशको वर्तमान आर्थिक अवस्था, लगानीको वातावरण, निजी क्षेत्रले भोगिरहेका चुनौती तथा आर्थिक पुनरुत्थानका सम्भावनाबारे पनि छलफल गरिएको थियो । यस्तै, अर्थतन्त्रलाई चलायमान बनाउन निजी क्षेत्रको भूमिका, लगानी विस्तार, रोजगारी सिर्जना तथा आर्थिक सुधारका विषयमा समेत छलफल गरिएको थियो ।

कार्यक्रममा प्रतिनिधिसभाअन्तर्गत राज्य व्यवस्था तथा सुशासन समितिका सभापति हरि ढकाल, सङ्घीय सांसद, अर्थशास्त्री, उद्योगी–व्यवसायी तथा विभिन्न क्षेत्रका सरोकारवालाको सहभागिता रहेको थियो । साथै, देशभरका उद्योगी–व्यवसायी, बैंक तथा वित्तीय संस्था, बीमा कम्पनी, स्वास्थ्य संस्था, ऊर्जा क्षेत्र तथा अन्य व्यावसायिक क्षेत्रका प्रतिनिधिहरूको उल्लेख्य उपस्थिति रहेको थियो ।

यो पनि पढ्नुहोस्–