शुक्रबार, असार ५, २०८३
कर्पोरट खबर
5:34 pm, शुक्रबार, असार ५, २०८३
काठमाडौं । कर्पोरेट मिडिया ग्रुपले श्री माता पाथिभरा डेरी इन्डष्ट्री प्रालिका प्रबन्ध निर्देशक गंगाबहादुर खड्कालाई ‘कर्पोरेट इन्डष्ट्री एक्सिलेन्स अवार्ड’ प्रदान गरेको छ ।
१८औँ संस्करणको ‘कर्पोरेट बिजनेश समिट एण्ड अवार्ड, २०२६’ अन्तर्गत खड्कालाई सो अवार्ड प्रदान गरिएको हो । ईश्वर लाल प्रतिष्ठानको सहकार्यमा कर्पोरेट मिडिया ग्रुपले बिहीबार काठमाडौंस्थित होटेल र्याडिसनमा आयोजना गरेको अवार्ड विशेष समारोहमार्फत प्रतिनिधसभा राज्य व्यवस्था तथा सुशासन समितिका सभापति हरि ढकालले उनलाई सो अवार्ड प्रदान गरे ।
दुग्ध उद्योगको आधुनिकीकरण र आत्मनिर्भर अर्थतन्त्रमा पुर्याएको योगदानको उच्च कदर गर्दै खड्कालाई सो अवार्ड प्रदान गरिएको कर्पोरेट मिडिया ग्रुका अध्यक्ष उज्वल जंग पराक्रम शाहले जानकारी दिए ।
सम्मानित खड्का नेपालको दुग्ध क्षेत्रका अग्रणी र सफल उद्यमी हुन् । उनले ग्रामीण किसानको उत्पादनलाई बजारसँग जोडेर आयआर्जन र रोजगारी वृद्धिमा उल्लेखनीय योगदान पुर्याउनाका साथै विशेषगरी मौलिक उत्पादन ‘छुर्पी’लाई अन्तर्राष्ट्रिय बजारमा स्थापित गरी स्वदेशी पहिचान दिलाउन नेतृत्वदायी भूमिका खेलेका छन् ।
कार्यक्रममा ‘कर्पोरेट एक्सिलेन्स’, ‘बैंकिङ, इन्स्योरेन्स एण्ड फाइनान्स’, ‘कर्पोरेट इन्डष्ट्री लिडरसिप’, ‘कर्पोरेट बिजनेश लिडरसिप’ र ‘लाइफटाइम एचिभमेन्ट’ सहित पाँचवटा विधामा कूल २९ वटा अवार्ड प्रदान गरिएको अध्यक्ष शाहले जानकारी दिए । नेपालको निजी क्षेत्र, बैंकिङ, बीमा, उद्योग, स्वास्थ्य, ऊर्जा तथा उद्यमशीलता क्षेत्रमा उल्लेखनीय योगदान पुर्याउने व्यक्ति तथा संस्थाहरूलाई सम्मान गर्ने उद्देश्यले विगत १८ वर्षदेखि ‘कर्पोरेट बिजनेश अवार्ड’ आयोजना गर्दै आएको उनको भनाइ छ ।
कार्यक्रममा अवार्ड वितरणसँगै देशको वर्तमान आर्थिक अवस्था, लगानीको वातावरण, निजी क्षेत्रले भोगिरहेका चुनौती तथा आर्थिक पुनरुत्थानका सम्भावनाबारे पनि छलफल गरिएको थियो । यस्तै, अर्थतन्त्रलाई चलायमान बनाउन निजी क्षेत्रको भूमिका, लगानी विस्तार, रोजगारी सिर्जना तथा आर्थिक सुधारका विषयमा समेत छलफल गरिएको थियो ।
कार्यक्रममा प्रतिनिधिसभाअन्तर्गत राज्य व्यवस्था तथा सुशासन समितिका सभापति हरि ढकाल, सङ्घीय सांसद, अर्थशास्त्री, उद्योगी–व्यवसायी तथा विभिन्न क्षेत्रका सरोकारवालाको सहभागिता रहेको थियो । साथै, देशभरका उद्योगी–व्यवसायी, बैंक तथा वित्तीय संस्था, बीमा कम्पनी, स्वास्थ्य संस्था, ऊर्जा क्षेत्र तथा अन्य व्यावसायिक क्षेत्रका प्रतिनिधिहरूको उल्लेख्य उपस्थिति रहेको थियो ।
