ओमिक्रोनका कारण नयाँ दिल्लीमा फेरि कर्फ्यू, नेपालमा के होला ?

एजेन्सी । कोभिड संक्रमण फेरि बढेन थालेको छ । कोरोना संक्रमण बढेपछि भारतको राजधानी नयाँ दिल्लीमा पुनः रात्रिकालीन कर्फ्यू लगाइने भएको छ । कोरानाको नयाँ भेरियन्ट ओमिक्रोनका कारण संक्रमितहरुको संख्या बढेपछि राज्य सरकारले सोमवारबाट कर्फ्यू लगाउने भएको हो ।

राति ११ बजेदेखि बिहान ५ बजेसम्म कर्फ्यू लगाउने भएको छ । भारतमा पछिल्लो २४ घन्टामा ७ हजारमा जना कोभिड संक्रमित भेटिएका छन् । उनीहरुमध्ये ४२२ जनामा नयाँ भेरियन्ट देखिएको छ । नयाँ भेरियन्टका बिरामी र अधिकांश संक्रमित नयाँ दिल्लीमा देखिएका छन् । यसअघि उत्तर प्रदेशमा पनि रात्रिकालीन कर्फ्यू लगाइएको थियो ।

नयाँ दिल्लीबाहेक अन्य सहरहरुमा पनि विभिन्न प्रतिबन्ध लगाइएका छन् । अंग्रेजी नयाँ वर्षमा होटल, रेस्टुराँ, सांगीतिक क्लबलगायतका बढी भिडभाड हुने क्षेत्रहरुमा मानिसहरुको चहलपहल बढ्ने भएकाले विभिन्न राज्यमा निषेधाज्ञा र कर्फ्यू लगाइएको छ । पछिल्लो समय नेपालमा पनि विस्तारै कोरोना संक्रमित बढ्न थालेका छन् ।

भारतमा कोरोना बढ्दा नेपालमा पनि त्यसको असर देखिने गरेको छ । खुला सिमानाका कारण भारतबाट नेपालमा कोरोना संक्रमण छिटो सर्ने गरेको छ । नेपालीले पनि समयमा नै सावधानी अपनाउन सकेको खण्डमा यसको न्यूनिकरण हुने जानकारहरुको भनाइ छ ।