समृद्धिका लागि उद्यमशीलताको विकास आवश्यक छ : उद्योगमन्त्री भण्डारी

काठमाडौँ । उद्योग, वाणिज्य तथा आपूर्तिमन्त्री दामोदर भण्डारीले समृद्धिका लागि औद्योगिक क्षेत्र र उद्यमशीलातको विकास आवश्यक रहेको बताएका छन् ।

उद्योग मन्त्रालय र नेपाल उद्योग परिसंघ (सीएनआई) द्वारा काठमाडौँ आयोजित महिला नेतृत्व शिखर सम्मेलनमा बोल्दै उनले (सीएनआई) ले निजी क्षेत्रको उत्पादनमूलक एवं सेवामूलक संस्थाको रूपमा नेपालमा औद्योगिक वातावरण निर्माण, नवप्रवर्तन प्रवर्द्धन, रोजगारी सिर्जना एवं समग्र आर्थिक विकासका लागि सरकारसँगको सहकार्यमा आफ्ना गतिविधि अघि बढाउँदै आएको बताए ।

परिसंघले उद्योग, राजश्व, पूर्वाधार, पर्यटन, महिला नेतृत्व फोरम लगायत समिति, परिषद्, फोरम गठन गरी गतिविधि एवं नीतिगत सुझाव दिदै आउनुका साथै सरोकारवाला अन्य संघ संस्थासँग सहकार्य, समन्वय गर्दै अर्थतन्त्रसँग सम्बन्धित विभिन्न क्षेत्रमा काम गर्दै आएको कुरा सन्तोषजनक रहेको बताए ।

उनले भने, ‘नेपालको समृद्धिको लागि औद्योगिक विकास महत्त्वपूर्ण छ । नेपाल उद्योग परिसंघले देशको द्रुत गतिमा परिवर्तन भइरहेको राजनीतिक–आर्थिक परिदृश्यमा विकसित र अनुकूलन गर्न आफ्ना सदस्य उत्पादन र सेवा उद्योगहरूलाई निरन्तर सहयोग गर्दै आइरहेको छ । यसले नीतिगत मुद्दाहरू र औद्योगिक विकासका मामिलाहरूमा सरकार र सम्बन्धित निकायहरूसँग नजिकबाट काम गरिरहेको छ । यसले सदस्य उद्योगहरूलाई दक्षता बढाउन, प्रतिस्पर्धात्मकता निर्माण गर्न र अवसरहरू विस्तार गर्न विस्तृत दायराका विशेष सेवाहरू समेत प्रदान गरिरहेको छ ।’

उनले परिसंघले हरेक दुई वर्षमा आयोजना गर्ने महिला नेतृत्व शिखर सम्मेलनमा परिवर्तनको संवाहक महिला विषय केन्द्रित कार्यक्रम सञ्चालन गरिरहेको बताए । उनले भने, ‘यस सन्दर्भमा आजको सम्मेलनमा उपस्थित वुमन लिडरसिपमा नेपाल सहित भारत, बेलायत, सिंगापुर, हङकङलगायत विभिन्न मुलुकका राजनीति, आर्थिक, सामाजिक, वातावरण लगायतका क्षेत्रमा स्थापित रूपान्तरणाकारी एवं प्रभावशाली महिलाहरूको सहभागिता रहेको हुँदा उपस्थित सम्पूर्ण महिलाहरूलाई प्रेरित तथा प्रोत्साहित गर्नेछ भन्ने कुरामा म विश्वस्त छु । साथै उद्यमशीलता प्रवर्द्धनका लागि महिला उद्यमीहरूबाट उत्पादित स्वदेशी वस्तुहरूको प्रदर्शनले महिला सशक्तीकरणमा थप टेवा पुग्न जाने प्रचुर सम्भावना रहने कुरामा म थप विश्वस्त छु ।’

उनले वर्तमान सरकारले सार्वजनिक निकायमा स्वदेशी बस्तुको प्रयोग अनिवार्य गर्ने कुरामा जोड दिएकाले उक्त कार्यक्रम महिला उद्यमीका फाइदाजनक भएको बताए ।

महिला नेतृत्व, शिखर सम्मेलनले परिवर्तन प्रेरित महिला नेतृत्व र राष्ट्रिय तथा अन्तर्राष्ट्रिय विज्ञहरूलाई एउटै थलोमा ल्याउने हुँदा नीतिगत तहमा नेपाल सरकार, सरोकारवाला निकायहरूले लिनुपर्ने नीतिगत विषयमा गहन रूपमा राखिएका छलफल कार्यक्रमको प्रस्तुतिबाट यो शिखर सम्मेलन वर्तमान एवं सफल उदाहरणहरूमा केन्द्रित हुने उनको भनाइ छ । उनले महिलाहरूलाई लिडरसिप तथा उद्यमशीलतामा पूर्ण अभिप्रेरित गर्ने बताए ।

उनले वर्तमान प्रधानमन्त्रीले राज्यका प्रमुख निकायहरूको नेतृत्वमा महिलालाई अवसर दिनु महत्त्वपूर्ण कार्य भएको बताए । प्रधानमन्त्री केपी ओलीको प्रमुख आथित्यतामा भएको कार्यक्रमका विशिष्ट अतिति उद्योग, वाणिज्य तथा आपूर्तिमन्त्री भण्डारी रहेका थिए ।