अर्थमन्त्री शर्मा भन्छन्– श्वेतपत्र जारी गर्दा विगतको नेतृत्वलाई गाली गरेर मलाई हिरो बन्नु छैन

काठमाडौं । अर्थमन्त्री जनार्दन शर्मा ‘प्रभाकर’ले आफूले तयार पार्ने भनेको श्वेतपत्रले कसकैको कमजोरी नभएर अर्थतन्त्रको यथार्थ चित्रण गर्ने जिकिर पनि गरेका छन् । श्वेतपत्र जारी गर्दा विगतको नेतृत्वलाई गाली गरेर आफूलाई हिरो बन्नु नपरेको भन्दै उनले सो कुरा बताएका हुन् ।

‘कसैको अबमूल्यन गर्ने काम गर्दिनँ । श्वेतपत्रले यथार्थ चित्रण गर्छ । राम्रो कि नराम्रो मुल्यांकन गर्ने जिम्मा सर्वसाधारणको हो,’ मन्त्री शर्माले भने । केही आफ्नो कुरा प्रस्तुत गर्दा कसैलाई गलत नदेखाउने आफ्नो मान्यता रहेको उनको भनाइ छ ।

‘श्वेतपत्र कसैलाई गल्ती देखाउन र आफूलाई हिरो देखाउन ल्याइने होइन । यही हो भने फिल्म खेल्न गए भइहाल्छ,’ मन्त्री शर्माले भने, ‘आफूलाई जे लाग्छ त्यतिमात्र बोल्ने छु, विगतको समीक्षा गरेर कसले कति गर्‍यो, कसले कति गरेन पनि भन्दिनँ ।’

मन्त्री शर्माले उपभोक्तामुखी अर्थतन्त्र बनाउने आफ्नो कार्यकालको मुल योजना रहेको पनि बताएका छन् । नयाँ सरकार गठन भएको स्थितमा आर्थिक अध्यायदेश संसदमा टेबल भएको बताउँदै उनले यसलाई टुङ्याउन पनि बाँकी रहेको तथा बुझ्न पनि आवश्यक रहेको बताए ।