निर्यात परिषद्को आयोजनामा बिहीबार फुटसल प्रतियोगिता हुँदै

नेपाल निर्यात परिषद्को आयोजनामा ‘प्रथम इकोन राष्ट्रपति कप अन्तरसंगठन फुटसल प्रतियोगितमा-२०८१’ हुने भएको छ ।

परिषद्ले निर्यात क्षेत्रमा संलग्न संघसंस्था र उद्यमी, व्यवसायीहरूमा आपसी सम्बन्धको विकास गराई नेपालको निर्यात प्रवर्द्धनमा महत्त्वपूर्ण योगदान पुर्‍याउने उद्देश्यले परिषद्का पूर्वअध्यक्ष राजु श्रेष्ठको सम्मानमा प्रतियोगिता आयोजना गरेको हो ।

बिहीबार बिहान ९ बजे महाराजगञ्ज शीतलमार्गस्थित ढुकु फुटसल हबमा प्रतियोगिता आयोजना हुने परिषद्का महासचिव हरि ढकालले जानकारी दिए ।

प्रतियोगितामा नेपाल निर्यात परिषद्, नेपाल चेम्बर अफ कमर्स, नेपाल हस्तकला महासंघ, नेपाल उद्योग वाणिज्य संघ काठमाडौं, नेपाल फ्रेट फरवार्डर्स एसोसिएशन, नेपाल गलैंचा उत्पादक तथा निकासीकर्ता संघ, नेपाल तयारी पोसाक उद्योग संघ, नेपाल पश्मिना उद्योग संघ, नेपाल हाते कागज संघ, नेपाल ऊनी फेल्ट उत्पादक तथा निर्यातक संघका अध्यक्षहरूको नेतृत्वमा कार्यसमितिका पदाधिकारी तथा सदस्यहरू एवं साधारण सदस्यहरूसहित १० वटा संघसस्थाहरूको सहभागिता रहने आयोजकले जनाएको छ ।