मंगलबार, फाल्गुन १२, २०८२
कर्पोरट खबर
12:24 pm, मंगलबार, फाल्गुन १२, २०८२
काठमाडौँ । सुनसरी र झापामा अवैध लागूऔषधसहित तीन जना पक्राउ परेका छन्।
सुनसरीको धरान उपमहानगरपालिका–८ तीनकुनेबाट प्रहरीले नियन्त्रित लागूऔषध ट्रामाडोल ५९० ट्याब्लेट र डिकोलिक ५९० ट्याब्लेटसहित दुई जनालाई नियन्त्रणमा लिएको छ। पक्राउ पर्नेमा मोरङको सुन्दरहरैँचा नगरपालिका–४ निवासी २१ वर्षीय सिजन अधिकारी र तेह्रथुम घर भएका २० वर्षीय नविन कडेल रहेका छन्।
अस्थायी प्रहरी चौकी तीनकुनेबाट खटिएको टोलीले प्र.१–०२–०५५ प ११३२ नम्बरको मोटरसाइकल जाँच गर्ने क्रममा उनीहरूलाई लागूऔषधसहित पक्राउ गरेको हो।
त्यस्तै, झापाको बुद्धशान्ति गाउँपालिका–३ किरात पार्क क्षेत्रबाट ब्राउनसुगर जस्तो देखिने १ ग्राम १० मिलिग्राम पदार्थसहित २४ वर्षीय सोनम शेर्पा पक्राउ परेका छन्। इलाका प्रहरी कार्यालय बुधबारेबाट खटिएको प्रहरी टोलीले उनलाई नियन्त्रणमा लिएको हो।
प्रहरीले उनले प्रयोग गरेको प्र.१–०१–००२ ह ६१७ नम्बरको अटो पनि बरामद गरेको जनाएको छ।घटनाबारे थप अनुसन्धान भइरहेको प्रहरीले जनाएको छ।
FACEBOOK COMMENTS