आइपिएल अघि चेन्नईलाई झट्का, धोनी दुई साता खेल्न नसक्ने

काठमाडौँ । इन्डियन प्रिमियर लिग (आइपिएल) को नयाँ सिजन सुरु हुनुअघि चेन्नई सुपर किंग्सलाई ठूलो झट्का लागेको छ ।

टोलीका अनुभवी विकेटकिपर ब्याट्सम्यान महेन्द्र सिंह धोनी सुरुआती दुई साता खेल्न नपाउने भएका छन् ।

टोलीले शनिबार जानकारी दिँदै धोनी पिँडुलाको चोटबाट पुन:स्थापनामा रहेको र पूर्ण रूपमा फिट हुन केही समय लाग्ने जनाएको छ ।

चेन्नईले आफ्नो अभियान सोमबार राजस्थान रोयल्सविरुद्ध सुरु गर्नेछ । सुरुआती दुई सातामा उसले पञ्जाब किंग्स, रोयल च्यालेन्जर्स बैंगलोर र दिल्ली क्यापिटल्ससँग पनि प्रतिस्पर्धा गर्ने तालिका रहेको छ ।

धोनी अनुपस्थित रहने अवस्थामा विकेटकिपिङको जिम्मेवारी सञ्जु सामसनले सम्हाल्ने छन् । उनी कप्तान ऋतुराज गायकवाडसँगै ओपनिङमा उत्रिनेछन् । टोलीमा अन्य विकल्पका रूपमा उर्विल पटेल र कार्तिक शर्मा रहेका छन् ।

चेन्नईले सामसनलाई ट्रेडिङमार्फत रविन्द्र जडेजा र साम करनलाई राजस्थानलाई दिएर सामसनलाई टोलीमा भित्र्याएको हो ।

गत सिजन धोनीले सबै खेल खेलेका थिए र प्राय: अन्तिम ओभरतिर मात्र ब्याटिङ गर्न आउने गरेका थिए ।

यसअघि पनि चेन्नईले चोटकै कारण अस्ट्रेलियाली तीव्र गतिका बलर नाथन एलिस गुमाएको थियो । उनको स्थानमा स्पेन्सर जोन्सनलाई टोलीमा ल्याइएको छ । अघिल्लो सिजन केवल चार जित हात पार्दै पुछारमा रहेको चेन्नई यसपटक सुधारिएको प्रदर्शन गर्ने लक्ष्यमा रहेको छ ।