एनसेलको सेयर खरिदबिक्री प्रकरणः सर्वोच्चले दुवै पक्षलाई बोलायो छलफलमा

काठमाडौं । एनसेल खरिदबिक्रीविरुद्ध परेको मुद्दामा सर्वोच्च अदालतले दुवै पक्षलाई छलफलमा बोलाएको छ ।

मंगलबार न्यायाधीश प्रकाशमान सिंह राउतको एकल इजलासले पुस १६ गते दुवै पक्षलाई छलफलमा बोलाएको हो । सर्वोच्चले विपक्षीको नाममा कारण देखाउ आदेश समेत दिएको छ ।

स्वतन्त्र सांसद सिंहले एनसेल बिक्री शंकास्पद भएको भन्दै सर्वोच्चमा मंसिर २२ गते मुद्दा दर्ता गरेका थिए । उनले एनसेल, नेपाल दूरसञ्चार प्राधिकरण, कम्पनी रजिष्ट्रारको कार्यालय, सञ्चार तथा सूचना प्रविधि मन्त्रालय, प्रधानमन्त्री तथा मन्त्रीपरिषद्को कार्यालय, ठूला करदाता कार्यालयलाई विपक्षी बनाउँदै मुद्दा हालेका थिए ।

विभिन्न मितिमा पटक पटक पेसीमा चढेपनि सुनुवाई भएको थिएन। मंगलबार भने न्यायाधीश सिंहको इजलासले सुनुवाई गरेको हो ।

एनसेलको ८० प्रतिशत सेयर व्यावसायी सतिशलाल आचार्यको स्पेक्ट्रलाइट कम्पनीले मंसिर १५ गते खरिद गरेको थियो । संसदको राज्य व्यवस्था समितिमा पनि एनसेलको बिषयमा जवाफ दिन प्रधानमन्त्री पुष्पकमल दाहाल समितिमा पुगेका छन् । सार्वजनिक लेखा समितिका साथै अर्थ समितिले पनि एनसेल खरिदबिक्रीमा चासो देखाएका छन् ।

सरकारले एनसेलको सेयर बिक्रीका सम्बन्धमा छानबिन गर्न पूर्वमहालेखापरीक्षक टंकमणि शर्माको संयोजकत्वमा ५ सदस्यीय समिति गठन गरेको थियो । समितिले अहिले खरिदबिक्रीको अध्ययन गरिरहेको छ । समितिलाई एक महिनाको समयसीमा दिइएको छ ।