वेस्ट इन्डिजमा खेलिने खेलमा सन्दीप लामिछाने सहभागी

काठमाडौं । हाल सञ्चालन भइरहेको आईसीसी टी–२० विश्वकप २०२४ का लागि सन्दीप लामिछाने वेस्ट इन्डिज प्रस्थान गरेका छन् ।

उनी नेपाली राष्ट्रिय क्रिकेट टोलीमा समावेश हुने छन् । नेपाल क्रिकेट संघ ९क्यान० ले आज विज्ञप्तिमार्फत उक्त कुरा जानकारी गराएको हो ।

‘जारी आईसीसी पुरुष टी-२० विश्वकप २०२४ का लागि नेपाली खेलाडी सन्दीप लामिछाने वेस्ट इन्डिज प्रस्थान भई नेपाली राष्ट्रिय क्रिकेट टोलीमा समावेश हुने जानकारी गराउन चाहन्छौँ । सम्मानित उच्च अदालत पाटनले गत मे १५ मा दिएको फैसलासँगै नेपाल क्रिकेट संघले पूर्व घोषित टिमबाट युवा बलर प्रतिश जिसीलाई ट्राभलिङ रिजर्भमा राख्ने निर्णय गर्दै सन्दीप लामिछानेलाई विश्वकप खेल्ने आधिकारिक १५ जना टोलीको अन्तिम नामावली आईसीसी सामु पेश गरेको थियो,’ विज्ञप्तिमा भनिएको छ ।

लामिछाने गत मे १६ तारिखदेखि नै नेपालको आधिकारिक टोलीमा रहेको क्यानको भनाई छ । आईसीसीसँग समन्वय गरी वेस्ट इन्डिजमा हुने दक्षिण अफ्रिका तथा बंगलादेशविरुद्ध नेपालका दुई खेलमा उनको उपस्थिति रहने क्यानले जानकारी गराएको छ ।