लाघुबीमाकाे लाईसेन्स प्रक्रिया निर्वाचनपछि पुन: सुरु हुन्छ: अध्यक्ष सिलवाल

काठमाडाैं । बीमा समितिले लाघुबीमा कम्पनीलाई लाईसेन्स दिने प्रक्रिया निर्वाचनपछि पुन: सुरु हुने जनाएको छ । बीमा समितिका अध्यक्ष सूर्य प्रसाद सिलवालले अहिले निर्वाचन आचारसंहिता लाग्ने भएकोले केहि समयको लागि प्रक्रिया रोकिएको तर निर्वाचन भईसकेपछि पुन: सुरु हुने बताए ।

उनले लघुबीमाको लाइसेन्स दिने कार्य स्थगित नभई निर्वाचनसम्मको लागि रोकिएको र निर्वाचन सकिएपछि पुन: सुरु हुने बताएका हुन् । निर्वाचन आयोगले केहि दिन अघि निर्वाचन आचारसंहिता लागु भईसकेपछि किन लाईसेन्स वितरण गर्ने कार्य गरेको र आचारसंहिता उल्लङ्घन भएको कसुरमा किन कारवाही नगर्ने भन्दै समितिलाई स्पष्टिकरण सोधेको थियो ।

समितिले जवाफमा लाईसेन्सको प्रक्रिया अचारसंहिता लागु हुनु भन्दा अगाडी नै सुरु भएको तर आचारसंहिता लागु भईसकेपछि त्यसमा अहिले थप कुनै कार्य नगरिने र निर्वाचनपछि प्रक्रिया पुन: सुचारु गरिने बताएको थियो ।

लघुबीमा कम्पनीको लाईसेन्सको लागि ३१ वटा कम्पनीले आवेदन दिएका छन् । बीमा समितिले आवेदन माग गरेको अन्तिम दिनसम्ममा ३१ वटा कम्पनीले आवेदन दिएका हुन् ।

बीमा समितिले ३५ दिन भित्र आवेदन दिन भन्दै भदौ १० गते सूचना सार्वजनिक गरेको थियो । बीमा समितिले ३ वटा जीवन र ४ वटा निर्जीवन गरि बढीमा ७ वटा लघुबीमा स्थापना गर्न भन्दै लघुबीमा लाईसेन्सको लागि भदौ १० गते आबेदन खुला गरेको हो । ७ वटालाई लाईसेन्स दिने भनिएकोमा ३१ वटा कम्पनीले आवेदन दिएका हुन् ।