राष्ट्र बैंकको २ अर्ब रुपैयाँको नागरिक बचतपत्रमा भोलिदेखि आवेदन दिन पाइने, यसरी दिन सकिन्छ आवेदन

काठमाडौं, जेठ १० – नेपाल राष्ट्र बैंकले ९ प्रतिशत ब्याज दिनेगरी नागरिक बचतपत्र जारी गर्ने भएको छ । बैंकले कुल २ अर्ब रुपैयाँको नागरिक बचतपत्र निष्कासन गर्न लागेको हो ।

५ वर्षे अवधिको यस्तो बचतपत्रमा लगानी गरेपछि ६–६ महिनामा ब्याज पाइने छ । कम्तीमा १० हजार रुपैयाँ र त्यसपछि १० हजारले भाग जाने निःशेष अंकमा लगानी गर्न सकिन्छ । यस्तो बचतपत्र बैंक तथा वित्तीय संस्थामा धितो राखेर आवश्यक परेको खण्डमा ऋण पनि लिन पाइन्छ ।

भोलि मंगलबारदेखि आगामी असार १ गतेसम्म यसमा लगानीका लागि आवेदन दिन सकिन्छ । ५ वर्षपछि अर्थात् २०८३ असार ६ गते यसको लगानी अर्थात् साँवा रकम फिर्ता हुने छ ।

आवेदन फारम विभिन्न बैंक तथा वित्तीय संस्थाका शाखा कार्यालयहरुमा पाइन्छ । साथै राष्ट्र बैंकको वेबसाइटमा गई ‘पब्लिक डेप्ट’मा गई डाउनलोड गर्न पनि सकिन्छ ।

डाउनलोड गरेको सो फारम भरेर बैंक तथा वित्तीय संस्थाका शाखा वा राष्ट्र बैंकका प्रदेश कार्यालयमा बुझाउन सकिने बताइएको छ । बचत पत्र खरिदका लागि रकम बुझाएकै मितिबाट ब्याज रकम गणना हुने छ । स्टक वा प्रमिसरी नोटको रुपमा बचतपत्र स्वीकार हुने राष्ट्र बैंकले जनाएको छ ।