तरकारीमा विषादीको प्रयोग कम हुँदै

काठमाण्डौँ — तरकारीमा विषादीको प्रयोग कम हुँदै गएको सरकारी परीक्षणले देखाएको छ ।

केन्द्रीय कृषि प्रयोगशालाले पाँच वर्षयता परीक्षण गरिएका तरकारीबारे तयार पारेको प्रतिवेदनअनुसार विषादीको प्रयोग क्रमशः घट्दो छ ।

प्रतिवेदनअनुसार २०७१ असार महिनामा १ सय ८७ तरकारीको परीक्षण गर्दा ३२ वटामा विषादी भेटिएको थियो ।

यो वर्ष ७ सय ७५ परीक्षणमा दुई वटामा विषादी भेटिएको छ ।

गत वर्ष १ हजार ८ सय ५० परीक्षणमा ४ वटामा मात्रै विषादी भेटिएको थियो ।

यही तथ्यांकका आधारमा अहिले क्रमशः विषादी घटदै गएको उल्लेख छ ।

विषादीले उपभोक्ताभन्दा किसानलाई बढी असर पार्ने हुँदा उनीहरू सचेत भएको प्रयोगशालाका वरिष्ठ बाली संरक्षण अधिकृत राजीवदास राजभण्डारीले बताए ।

यस्तै बजेट अभावले तरकारी परीक्षण कार्य प्रभावित हुँदै आएको छ ।

हाल तरकारी परीक्षण केन्द्र कालीमाटी, बिर्तामोड, सर्लाही, पोखरा, बुटवल, नेपालगन्ज, कैलालीमा छन् ।

तीमध्ये कालीमाटी, बिर्तामोड र कैलाली फाटफुट रूपमा परीक्षण भइरहेको केन्द्रीय कृषि प्रयोगशालाले जनाएको छ ।

— कान्तिपुर