सिटिजन्स बैंक र सिर्जन फाइनान्सले असार २६ गतेदेखि एकिकृत कारोबार सुरु गर्ने

काठमाडौं ।  सिटिजन्स बैंक इन्टरनेसनल लिमिटेडले सिर्जन फाइनान्सलाई प्राप्ती गरी असार २६ गतेदेखि एकिकृत कारोबार सुरु गर्ने भएको छ । यी दुबै कम्पनीले जेठ २७ गते अलग अलग विशेष साधारण सभामार्फत प्राप्ती सम्बन्धी प्रस्ताव पारित गरेका थिए ।

नेपाल राष्ट्र बैंकले असार १५ गते र कम्पनी रजिष्ट्रार कार्यालयले असार १७ गते प्राप्तीका लागि अन्तिम स्वीकृति पश्चात दुबै कम्पनीले एकिकृत कारोबार गर्न लागेका हुन । दुबै कम्पनी एक भई सिटिजन्स बैंक इन्टरनेशनल लिमिटेडको नामबाट एकिकृत कारोबार सुरु गर्न लागेका हुन । एकिकृत कारोबारका लागि दुबै कम्पनीको विवरणलाई एउटै सफ्टवेयरमा कारोबार गर्न डाटा माइग्रेसन गर्नुपर्ने भएकाले असार २५ गते साझ ५ बजेदेखि असार २६ गतेसम्म दुबै कम्पनीको सम्पूर्ण सेवा बन्द रहने भएको छ ।

नेपाल राष्ट्र बैंकबाट “ग” वर्गको इजाजत प्राप्त, बिराटनगरमा प्रधान कार्यालय रहेको सिर्जना फाइनान्स लिमिटेलाई सिटिजन्स बैंक इन्टरनेसनल लिमिटेडले १०० बराबर ९५ को शेयर आदानप्रदान गर्ने गरी प्राप्ती गरेको हो । यस अनुसार, सिर्जना फाइनान्स लिमिटेडका शेयरधनीले १०० कित्ता शेयर बराबर सिटिजन्स बैंक इन्टरनेसनल लिमिटेडको ९५ कित्ता शेयर पाउनेछन् । सिटिजन्स बैंकको हालको चुक्ता पूँजी रू. ११ अर्ब ६६ करोड रहेकोमा प्राप्ति पश्चात यो पूँजी रू. १२ अर्ब ५८ करोड पुग्नेछ ।

२०७८ साल जेठ २६ गते सम्मको तथ्यांकको आधारमा सिटिजन्स बैंक इन्टरनेसनल लिमिटेडले सिर्जना फाइनान्स लिमिटेडलाई समेत प्राप्ति गरेपछि सर्वसाधारणबाट उठाएको निक्षेप करिव रू. १ खर्ब ३८ अर्ब हुनेछ भने सर्वसाधारणलाई दिएको ऋण लगानी करिव रू. १ खर्ब २२ अर्ब हुनेछ ।

प्राप्ति पश्चात बैंकको कुल शाखा १८९ हुनेछ । हाल यस बैंकको प्रदेश नं १ मा १३ वटा शाखा रहेकोमा सिर्जना फाइनान्स लिमिटेडको प्राप्ति पश्चात् उत्त प्रदेशमा बैंकको जम्मा २७ वटा शाखाहरु र प्रदेश नं २ मा २० वटा शाखाहरु रहेकोमा प्राप्ति पश्चात् उक्त प्रदेशमा २७ वटा शाखाहरु हुनेछन् ।

बैंकले सातवटै प्रदेशमा आफ्नो सक्रिय उपस्थिति बनाउँदै लगेको छ । प्राप्ति पछि बैंकको ग्राहक सङ्ख्या करिव १२ लाख पुग्नेछ । सिटिजन्स बैंकले यस अघि तिनाउ मिसन डेभलपमेण्ट बैंकलाई प्राप्ती गरी चैत १४ गतेदेखि एकिकृत कारोबार सुरु गरिसकेको छ । सिटिजन्स बैंकले तिनाउ मिसन डेभलपमेण्ट बैंकलाई १००ः९६ को अनुपातमा शेयर आदानप्रदान गरी प्राप्ती गरेको हो ।