दाउन्ने एग्रो फार्म प्रालिलाई कम्पनी बनाइँदै

चितवन | पोल्ट्री फार्मलाई लिमिटेड कम्पनी (पब्लिक कम्पनी)मा लगिने भएको छ । फार्म प्रालिलाई सर्वसाधारणलाई शेयर वितरण गरेर लिमिटेड कम्पनी बनाउन लागिएको हो ।

देशकै ठूलो कम्पनीले शनिवार पूर्वी चितवनको रत्ननगरमा विशेष साधारणसभा गरी पब्लिक कम्पनीमा लैजाने निर्णय गरेको हो । कम्पनीका कार्यकारी निर्देशक विनोद पोखरेलका अनुसार साधारण सभाबाट पब्लिकमा जाने गरी निर्णय गरेर प्रक्रिया अघि बढाइएको छ ।

कम्पनीको पोल्ट्री फार्म विनयी त्रिवेणी गाउँपालिका वडा नम्बर ३ सर्दी नवलपुरमा रहेको छ ।

सो कम्पनी र भगिनी कम्पनी गरी सो क्षेत्रमा ३३ बिघा जमिनमा फार्म रहेको छ । कार्यकारी निर्देशक पोखरेलका अनुसार फार्ममा ४ लाख लेयर्स कुखुरा छन् । फार्ममा १ अर्ब ५० करोड लगानी भइसकेको छ ।

फार्म विस्तारका क्रममा रहेकाले २ अर्बभन्दा बढी लगानी पुग्नेछ । कम्पनीमा हाल ४० जना शेयर सदस्य छन् । कुखुराका लागि आवश्यक पर्ने चल्ला हुर्काउने खोर, अण्डा भण्डारण केन्द्र, दाना भण्डारण केन्द्र, कर्मचारी आवास लगायतका संरचना रहेका छन् । सँगै क्रेट उद्योग र मल उद्योग पनि रहेका छन् ।

उनका अनुसार त्यहाँ दैनिक १ हजार ६०० पेटी अण्डा उत्पादन हुँदै आइरहेको छ । एकान्त र सुरक्षित ठाउँमा कम्पनी अवस्थित रहेको हुनाले अण्डाको उत्पादन र उत्पादकत्व दुवै उच्च छ । अत्याधुनिक स्वचालित प्रणालीमा अण्डाको ग्रेडिङ गरी उपभोक्तालाई सहुलियत मूल्यमा कम्पनीले अण्डा बिक्री गरिरहेको छ ।

कम्पनीका उपकार्यकारी निर्देशक विपिन पोखरेलले कम्पनीले भगिनी संस्था किसान दाना उद्योगले बजारीकरण गरिरहेको डिपोहरूमार्फत अण्डा बिक्री गरिरहेको बताए । हालसम्म देशका विभिन्न शहरमा १५ वटा डिपो र अन्य डिलरमार्फत अण्डा बिक्री हुँदै आइरहेको उनको भनाइ छ । उनले भने, ‘कम लागतमा अण्डा उत्पादन गरेर सस्तो र सर्वसुलभ रूपमा उपभोक्तासमक्ष पुर्‍याउने हाम्रो लक्ष्य छ ।’

कम्पनीका अध्यक्ष रघुनाथ भट्टले पोल्ट्री फार्म पब्लिकमा जान लागेको नेपालमै पहिलो भएको बताए । आम नागरिकलाई सेयरधनी बनाएर देशका अन्य ठाउँमा समेत अत्याधुनिक फार्म निर्माण गरी कम लागतमा धेरै अण्डा उत्पादन गर्ने र सर्वसुलभ रूपमा उपभोक्तासम्म पुर्‍याउने लक्ष्य रहेको उनले जानकारी दिए । विशेष साधारण सभाले निर्णय गरेसँगै पब्लिकमा जाने प्रक्रिया अघि बढेको उनको भनाइ छ ।