उज्जवलजंग शाह काठमाडौं उद्योग वाणिज्य संघको मेला प्रदर्शनी तथा प्रकाशन समिति संयोजकमा नियुक्त

काठमाडौं । काठमाडौं उद्योग वाणिज्य संघको मेला प्रदर्शनी तथा प्रकाशन समिति संयोजकमा उज्जवलजंग शाह नियुक्त भएका छन् । संघका अध्यक्ष दिनेश श्रेष्ठले काठमाडौं उद्योग वाणिज्य संघका कार्यकारिणी सदस्य समेत रहेका शाहलाई उक्त जिम्मेवारी दिएका हुन् ।

काठमाडौंको बसन्तपुरमा जन्मिएका शाह विगत २५ बर्ष देखी निरन्तर संचार क्षेत्रमा सकृय रहेका छन् । शाह संचार उद्यमीका साथै बरिष्ठ आर्थिक पत्रकार हुन् । उनले बजार व्यवस्थापक, संचारगृह संचालक र सम्पादकको अनुभव संगालेका छन् ।

कर्पोरेट म्यागाजिन तथा कर्पोरेट खबर डटकमका संचालक एवम् सम्पादक शाह नेपालमा आर्थिक पत्रकारिता अन्तर्गत कर्पोरेट धारसँग सम्बन्धित रहेर कलम चलाउने अग्रणी संचारकर्मीमा पर्छन् । अन्य क्षेत्रमा पनि शाहले कलम चलाउने गरेका छन् ।

शाह अटो पत्रकार संघका संस्थापक अध्यक्ष समेत हुन् । उनी नेपालको अग्रणी व्युटि शैलुन फेसियल हाउसका सल्लाहकार हुन् । निजी क्षेत्रसँग निकट सम्बन्ध भएका शाह यस क्षेत्रका समस्या र देशको आर्थिक अवस्थाका बारेमा जानकार छन् ।