भक्तपुरमा यस वर्ष गाईजात्रा महोत्सव नहुने

साउन ६ -भक्तपुरमा यो वर्ष गाईजात्रा महोत्सव नमनाइने भएको छ । गाईजात्रामा प्रतियोगितात्मक सांस्कृतिक प्रदर्शनी नहुने भएपछि १५ दिन अघिदेखि गरिने झाँकी अभ्यास पनि रोकिएको छ ।

भक्तपुर गलसिपुखुस्थित महाकाली नाचका मूल नाइके तुल्सीनारायण दण्डेख्याका अनुसार कोरोनाबाट बच्न यो पल्ट प्रतियोगिता नहुने भएकाले नाच अभ्यास नगरिएको हो । यस पटक गाईजात्रा साउन २० गते परेको छ । विगतमा भक्तपुरको प्रसिद्ध घिन्ताङघिसी नाच लगायतका धेरै स्थानीय नाच प्रतियोगितामा सहभागी हुने गर्थे ।