रघुनन्दन मारुलाई ‘कर्पोरेट इन्डष्ट्री लिडरसिप अवार्ड’

एफएनसीसीआईको हालै सम्पन्न ६०औँ वार्षिक साधारण सभाबाट वस्तुगत सदस्य निर्वाचित भएका उनी कार्यकाल पर्खाइमा छन्

काठमाडौं । कर्पोरेट मिडिया ग्रुपले नेपाल उद्योग वाणिज्य महासंघ (एफएनसीसीआई) का ‘वेटिङ’ कार्यकारिणी सदस्य’ रघुनन्दन मारुलाई ‘कर्पोरेट इन्डष्ट्री लिडरसिप अवार्ड, २०२६’ प्रदान गरेको छ ।

१८औँ संस्करणको ‘कर्पोरेट बिजनेश समिट एण्ड अवार्ड, २०२६’ अन्तर्गत उनलाई सो अवार्ड प्रदान गरिएको हो ।

ईश्वर लाल प्रतिष्ठानको सहकार्यमा कर्पोरेट मिडिया ग्रुपले बिहीबार काठमाडौंस्थित होटेल र्‍याडिसनमा आयोजना गरेको विशेष समारोहमार्फत प्रतिनिधसभा राज्य व्यवस्था तथा सुशासन समितिका सभापति हरि ढकालले मारुलाई सो अवार्ड प्रदान गरे ।

उद्योग विकास, रोजगारी सिर्जना र राष्ट्रिय अर्थतन्त्रमा पुर्‍याएको विशिष्ट योगदानका लागि उनलाई उक्त अवार्ड प्रदान गरिएको कर्पोरेट मिडिया ग्रुपका अध्यक्ष उज्वल जंग शाहले जानकारी दिए ।

रघुनन्दन मारु नेपाली सिमेन्ट उद्योगका अग्रणी उद्योगी हुन् । चार दशकभन्दा बढी समयदेखि खनिज उत्खनन र औद्योगिक क्षेत्रमा सक्रिय उनले स्वदेशी उत्पादन, औद्योगिकीकरण तथा निजी क्षेत्रको प्रवर्द्धनमा महत्त्वपूर्ण योगदान पुर्‍याएका छन् ।

जेबी मारु समूहका नेतृत्वकर्ता तथा शिवम् सिमेन्टका निर्देशक रहेका मारु नेपाल सिमेन्ट उत्पादक सङ्घका अध्यक्ष समेत हुन् । एफएनसीसीआईको हालै सम्पन्न ६०औँ वार्षिक साधारण सभाबाट वस्तुगत सदस्य निर्वाचित भएका उनी कार्यकाल पर्खाइमा छन् ।

१३ जना सदस्य निर्वाचित हुने सो कलष्टरमा अन्तिम चार जनाले समान ५०/५० मत प्राप्त गरेपछि आधा–आधा कार्यकाल काम गर्ने सहमति गरिएको छ । त्यस अनुसार उनी ‘वेटिङ’ कार्यकारिणी सदस्यका रूपमा रहेका हुन् ।

कार्यक्रममा ‘कर्पोरेट एक्सिलेन्स’, ‘बैंकिङ, इन्स्योरेन्स एण्ड फाइनान्स’, ‘कर्पोरेट इन्डष्ट्री लिडरसिप’, ‘कर्पोरेट बिजनेश लिडरसिप’ र ‘लाइफटाइम एचिभमेन्ट’ सहित पाँचवटा विधामा कूल २९ वटा अवार्ड प्रदान गरिएको अध्यक्ष शाहले जानकारी दिए । नेपालको निजी क्षेत्र, बैंकिङ, बीमा, उद्योग, स्वास्थ्य, ऊर्जा तथा उद्यमशीलता क्षेत्रमा उल्लेखनीय योगदान पुर्‍याउने व्यक्ति तथा संस्थाहरूलाई सम्मान गर्ने उद्देश्यले विगत १८ वर्षदेखि ‘कर्पोरेट बिजनेश अवार्ड’ आयोजना गर्दै आएको उनको भनाइ छ ।

कार्यक्रममा अवार्ड वितरणसँगै देशको वर्तमान आर्थिक अवस्था, लगानीको वातावरण, निजी क्षेत्रले भोगिरहेका चुनौती तथा आर्थिक पुनरुत्थानका सम्भावनाबारे पनि छलफल गरिएको थियो । यस्तै, अर्थतन्त्रलाई चलायमान बनाउन निजी क्षेत्रको भूमिका, लगानी विस्तार, रोजगारी सिर्जना तथा आर्थिक सुधारका विषयमा समेत छलफल गरिएको थियो ।

कार्यक्रममा प्रतिनिधिसभाअन्तर्गत राज्य व्यवस्था तथा सुशासन समितिका सभापति हरि ढकाल, सङ्घीय सांसद, अर्थशास्त्री, उद्योगी–व्यवसायी तथा विभिन्न क्षेत्रका सरोकारवालाको सहभागिता रहेको थियो । साथै, देशभरका उद्योगी–व्यवसायी, बैंक तथा वित्तीय संस्था, बीमा कम्पनी, स्वास्थ्य संस्था, ऊर्जा क्षेत्र तथा अन्य व्यावसायिक क्षेत्रका प्रतिनिधिहरूको उल्लेख्य उपस्थिति रहेको थियो ।

यो पनि पढ्नुहोस्–