विश्वकप छनौटमा इंग्ल्याण्डको विजयी यात्रा कायम

काठमाडौँ, १८ चैत – विश्वकप २०२२ को छनौट अन्तर्गतका खेलमा इंग्ल्याण्डले लगातार जितको शृङ्खला कायम राखेको छ ।

युरोपेली क्षेत्रको छनौट अन्तर्गत बुधबार राति भएको खेलमा समूह आई मा रहेको इंग्ल्याण्डले पोल्याण्डलाई २–१ ले पराजित गरेको हो ।

घरेलु मैदानमा भएको खेलमा इंग्ल्याण्डलाई जिताउन १९ औँ मिनेटमा पाएको पेनाल्टीमा ह्यारी केन तथा ८५ औँ मिनेटमा ह्यारी मागुइरीले गोल गरे । पोल्याण्डका लागि ५८ औँ मिनेटमा मोडेरले एक गोल फर्काए ।

लगातार तीन खेलमा जित दर्ता गरेको इंग्ल्याण्ड ९ अंकसहित समूहको शीर्ष स्थानमा छ । तीन खेलबाट चार अंकसहित पोल्याण्ड चौथो स्थानमा छ ।