सोमबार, असोज ५, २०८३
कर्पोरट खबर
6:46 am, सोमबार, असोज ५, २०८३
काठमाडौं । स्पेनिस ला लिगाअन्तर्गत गएराती भएको म्याड्रिड डर्बीमा एट्लेटिको म्याड्रिडले रियल म्याड्रिडलाई २-१ गोल अन्तरले पराजित गरेको छ ।
घरेलु मैदानमा एट्लेटिकोलाई जित दिलाउन अलेजान्द्रो ग्रिमाल्डो र जोनाथन डेभिडले गोल गरेका थिए । रियलका लागि अन्तिम समयमा एन्टोनियो रुडिगरले गोल फर्काए पनि टोलीलाई हारबाट जोगाउन सकेनन् ।
दोस्रो हाफको सुरुआतमै रियलका डिफेन्डर डिन हुइजेनले जुलियानो सिमोनेलाई पेनाल्टी क्षेत्रमा फाउल गरेपछि रातो कार्ड पाएका थिए । त्यसपछि प्राप्त पेनाल्टीमा ग्रिमाल्डोले ५३औँ मिनेटमा गोल गर्दै एट्लेटिकोलाई अग्रता दिलाएका थिए । त्यसको केही मिनेटपछि जुलियानो सिमोनेको पासमा जोनाथन डेभिडले गोल गर्दै एट्लेटिकोको अग्रता २–० बनाए । रियल १० खेलाडीमा सीमित भएपछि एट्लेटिकोले खेलमा दबाब कायम राखेको थियो ।
रियलका रुडिगरले ८९औँ मिनेटमा हेडमार्फत गोल गर्दै खेलमा फर्किने सम्भावना देखाएका थिए । तर बाँकी समयमा एट्लेटिकोले रियलका आक्रमण रोक्दै महत्वपूर्ण तीन अंक सुरक्षित गर्यो ।
जितसँगै एट्लेटिको ७ खेलबाट १६ अंक जोडेर तालिकाको दोस्रो स्थानमा पुगेको छ । रियल म्याड्रिड भने सिजनको दोस्रो हार बेहोर्दै १५ अंकसहित तेस्रो स्थानमा छ भने सातवटै खेल जितेको बार्सिलोना २१ अंकसहित शीर्ष स्थानमा छ ।
