चिनियाँ मिडियासँगको अन्तर्वार्तामा ओलीले भने- हाम्रो सबैसँग मित्रता छ, कसैसँग शत्रुता छैन

काठमाडौं । प्रधानमन्त्री केपी शर्मा ओलीले प्रतिकूल परिस्थितिमा पनि सत्य र न्यायप्रति अटल रहने प्रतिबद्धता जनाएका छन् ।

बुधबार चाइना मिडिया ग्रुपसँगको एक विशेष अन्तर्वार्तामा उनले आफ्नो राजनीतिक करियर र व्यक्तिगत जीवनका बारे खुलेर धारणाहरू राखेका थिए । त्यसक्रममा उनले किशोर अवस्थामा आफू हजुरआमा र अन्य अभिभावकहरू साथै शिक्षकहरूबाट सत्यको अनुसरण गर्नुपर्छ भन्ने सिकेको बताए ।

‘हरेक पटक सत्यको जित हुँदैन, तर अन्त्यमा सत्यको जित हुन्छ,’ उनले भने । अन्तर्वार्ताका क्रममा ओलीले आफूले राजनीतिक यात्रा सुरू गर्दा निकै अन्धकारपूर्ण अवस्था रहेको र संघर्ष गर्नुपरेको एवम् संघर्षको नेतृत्व गरेपछि राजनीतिक परिवर्तन ल्याएको उल्लेख गरे ।

सो क्रममा उनले चिनियाँ राष्ट्रपति सी चिनफिङले प्रस्ताव गरेका तीनवटा विश्वव्यापी पहलको अन्तरसम्बन्ध विश्व शान्ति र सुरक्षा हासिल गर्नु रहेकाले त्यसले आर्थिक विकासमा महत्त्वपूर्ण भूमिका खेलेको उल्लेख गरे । प्रधानमन्त्री ओलीले विश्वमा शान्ति र समृद्धि अपरिहार्य भएको उल्लेख गरे ।

‘आर्थिक विकासका लागि आर्थिक सुरक्षा जरूरी छ । भोका जनताले केही गर्न सक्दैनन् । आर्थिक समृद्धि पहिलो हो । हामी जनतालाई खुसी बनाउन चाहन्छौं । संसारका प्रत्येक व्यक्तिले आफू सुरक्षित छ भनी महसुस गर्नुपर्छ । समाजमा समानता हुनुपर्छ । त्यसका लागि चीनको प्रयास सकरात्मक छ,’ अन्तरवार्ताका क्रममा उनले भने ।

त्यस्तै उनले साझा मूल्यमान्यता र समझदारीका आधारमा एकताबद्ध भएर नेपाल-चीन मित्रता अझै प्रगाढ बनाउनुपर्ने उल्लेख गरे । ‘हाम्रो नारा र नीति सबैसँग मित्रता र कसैसँग शत्रुता छैन भन्ने हो । नेपाल सार्वभौम र राजनीतिक रूपमा स्वतन्त्र देश हो । हामी हाम्रो आन्तरिक र बाह्य नीतिहरूमा निर्णय गर्न स्वतन्त्र छौं ,’ उनले भने ।

नेपाल र चीनको मित्रता पुरानो भएको उल्लेख गर्दै ओलीले दुई देशबीचको मित्रता निरन्तर विकसित, गहिरो, फराकिलो हुँदै गइरहेको बताए । प्रधानमन्त्री ओलीले चीनको विकास पूर्ण र व्यापक बन्दै गएकाले शिक्षा, स्वास्थ्य र अर्थतन्त्रलगायत विभिन्न क्षेत्रमा चीनले बहुआयामिक सफलता हासिल गरेको औंल्याए ।

अन्तरवार्ताका क्रममा प्रधानमन्त्री ओलीले चीनको बेल्ट एण्ड रोड इनिसियटिभको ढाँचाभित्र नेपालले गरेको सम्झौताले दुई देशको विकास रणनीतिको प्रतिबद्धतालाई सुदृढ बनाउने पनि बताए ।

‘यसपटक हामीले बीआरआई कार्यान्वयन ढाँचामा हस्ताक्षर गर्‍यौं । र, यो एक धेरै महत्त्वपूर्ण सम्झौता हो, जुन छाता सम्झौताजस्तै हो । जसअन्तर्गत राजनीतिक, आर्थिक, सामाजिक, सांस्कृतिक, शैक्षिक, सबै क्षेत्रहरू समेट्ने धेरै परियोजनाहरू हुनेछन् । र, स्वास्थ्य र पूर्वाधार, विकास क्षेत्र पनि समेटिनेछन्,’ उनले भने ।

चिनियाँ प्रधानमन्त्री ली छ्याङको निमन्त्रणामा ओली गत सोमबारदेखि चारदिने औपचारिक भ्रमण सकेर स्वदेश फर्किसकेका छन् । भ्रमणका क्रममा उनले नेपाल र चीनबीचको कूटनीतिक सम्बन्धको ७० औं वार्षिकोत्सव सन् २०२५ मा पूरा हुने भएकाले सो अवसरमा विशेष समारोहको आयोजना गरिने पनि बताए ।