नागार्जुनमा जीपसँग ठक्कर खाँदा मोटरसाइकल चालकको मृत्यु

काठमाडौँ । नागर्जुनमा सवारीसाधन दुर्घटना हुँदा एक जनाको मृत्यु भएको छ । नागार्जुन नगरपालिका-७ स्थित बिन्दावासिनी सडकखण्डमा स्विजरल्याण्ड पार्कबाट कलङ्कीतर्फ आउँदै गरेको प्र०१-०२५च ९२४३ नम्बरको जीपमा विपरीत दिशाबाट गइरहेको बाप्र०२-०१७प १०९ नम्बरको मोटरसाइकल ठक्कर खाई दुर्घटना भएको हो ।

दुर्घटनामा परी दोलखा मोटरसाइकल चालक शैलुङ्गेश्वर नगरपालिका-६ घर भई हाल काठमाडौँ महानगरपालिका-१३, छाउनी बस्ने २० वर्षीय सजन सुवेदीको मृत्यु भएको जिल्ला प्रहरी परिसर काठमाडौँका प्रवक्ता प्रहरी उपरीक्षक नवराज अधिकारीले जानकारी दिए ।

शनिबार दुर्घटना भई गम्भीर घाइते भएका सुवेदीको कलङ्कीस्थित सहिद मेमोरियल अस्पतालमा उपचारका क्रममा आज मृत्यु भएको उनले जानकारी दिए ।

सो समयमा फरार रहेका गाडी चालक सुनसरी घर भई हाल काठमाडौँको नैकाप बस्ने ४३ वर्षीय जगतबहादुर मगरलाई नियन्त्रणमा लिई अनुसन्धान भइरहेको प्रहरी उपरीक्षक अधिकारीले जानकारी दिए ।