अर्थतन्त्र गतिशील हुने अपेक्षा छ: चन्द्र ढकाल

नवलपरासी । उद्योग वाणिज्य महासंघका अध्यक्ष एंम आईएमई ग्रुपका अध्यक्ष चन्द्रप्रसाद ढकालले सरकारलाई विना लगानीको पार्टनर (साझेदार) बन्न सरकारलाई आग्रह गरेका छन् ।

सोमबार पूर्वी नवलपुर गैंडाकोट–मौलाकाली केबलकारको उद्घाटन कार्यक्रममा बोल्दै अध्यक्ष ढकालले पूर्वाधार क्षेत्रको विकास कार्यक्रममा सरकारले निजी क्षेत्रलाई सघाउनुपर्ने बताए ।

कतिपय परियोजनाहरुमा सार्वजनिक (निजी साझेदारी (पीपीपी) मोडलमा काम गर्नुपर्ने भएपनि नसकिएको अवस्थामा सरकारले विना लगानीको पार्टनरशिपको रुपमा निजी क्षेत्रलाई सहयोग गर्नुपर्ने बताए ।

महासंघका अध्यक्ष ढकालकै लगानी रहेको आईएमई ग्रुपले पूर्वी नवलपरासीको गैंडाकोटदेखि प्रसिद्ध धार्मिक स्थल मौलाकालीसम्म जाने केबलकार सोमबारदेखि औपचारिक रुपमै सञ्चालनमा ल्याएको छ ।

प्रधानमन्त्री पुष्पकमल दाहाल ‘प्रचण्ड’ले केबलकारको उद्घाटन गरेका छन् ।

गैंडाकोटदेखि मौलाकालीसम्मको करिव एक हजार दुई (१२ सय) मिटरको दुरीमा रहेको केबलकारको लगानी १ अर्ब ५० करोड रुपैयाँ रहेको छ ।

तर, केबलकारको टप स्टेसनमा सुविधासम्पन्न तीन तारे होटल समेतको लगानी २ अर्ब हाराहारी रहेको कम्पनीले बताएको छ ।

धार्मिक पर्यटकलाई केन्द्रित गरेर बनाइएको यश केबलकारले नवलपरासीको पर्यटन व्यवसायलाई समेत विशेष योगदान पुग्ने उनले बताए ।