कतार प्रवेश गर्ने नेपाली यात्रुहरुका लागि प्रचलित मापदण्डमा परिवर्तन

काठमाडौँ ।  कतार सरकारले कतार प्रवेश गर्ने नेपाली यात्रुहरुका लागि प्रचलित मापदण्डमा परिवर्तन भएको छ । भोलिदेखि लागू हुने गरी कतार सरकारले कतार प्रवेश गर्ने यात्रुहरुको लागि संशोधनसहितको मापदण्ड लागू गर्न लागेको दोहास्थित नेपाली दूतावासले जनाएको छ ।

कतार प्रवेश गर्ने यात्रुका लागि स्वास्थ्य मापदण्डमा परिवर्तन भएको छ । अब कतार जाने यात्रुले दुवै खोप लगाएका छन् भने क्वारिन्टिनमा बस्नु नपर्ने भएको छ । साथै, कतारमा मान्यता दिएका खोपको मात्रा कुनै देशमा पूरा गरी प्रमाणपत्र प्राप्त गरेका यात्रुले समेत क्वारिन्टिन बस्नु नपर्ने भएको छ ।

यसैगरी, कतारमा कोभिड-१९ संक्रमण भई निको भएको १२ महिनाभित्र यात्रा गर्ने यात्रुलेसमेत क्वारिन्टिन बस्नु नपर्ने भएको छ । खोपका मात्रा पूरा नगरेका वा खोप नलगाएका यात्रुको हकमा अनिवार्यरूपमा ‘डिस्कोभर कतार’ वेबसाइटमा गई बुकिङ गरी १० दिन होटल क्वारिन्टिन वा १४ दिन मेखाइनिस क्वारिन्टिन बस्नुपर्नेछ ।

हरेक यात्रुले नेपालमा तोकिएका स्वास्थ्य संस्थाबाट जारी भएको ७२ घण्टाभित्रको कोभिड-१९ नेगेटिभ पीसीआर रिपोर्ट लिएर मात्र यात्रा गर्न पाइनेछ । माथि उल्लेखित खोपको मात्रा पूरा गरी प्रमाणपत्र प्राप्त गरेका व्याक्तिका लागि पारिवारिक भ्रमण, व्यवसाय तथा पर्यटक भिसा जारी गर्न सकिने छ ।