सिडियोको सहीछाप गरी नक्कली पास बनाउने दुई पक्राउ

असार १५ – सरकारले कोरोना भाइरस नियन्त्रणका लागि गरेको लकडाउनमा नक्कली पास बिक्री वितरण गर्ने दुईजनालाई लहान प्रहरीले पक्राउ गरेको छ । पक्राउ पर्नेमा लहान नगरपालिका (१ स्थितमा रहेको मेरो साईबर एण्ड ट्राभल्समा सञ्चालक विजेन्द्र महतो र प्रमेश्वर महतो छन् । उनीहरुलाई प्रहरी नायब उपरीक्षक शरतकुमार थापा क्षेत्रीको कमान्डमा खटिएको प्रहरी टोलीले पक्राउ गरेको हो ।

लकडाउनको समयमा प्रमुख जिल्ला अधिकारीका सही छाप गरेको सादा प्रिन्टको पास किर्ते बनाई बिक्री वितरण गरेको भन्दै २ जनालाई प्रहरीले पक्राउ गरेको सिरहाका प्रहरी प्रवक्ता एवम् प्रहरी नायव उपरीक्षक विनोद घिमिरेले जानकारी दिए ।

पक्राउ परेका दुवै जनालाई विभिन्न कार्यालयको छाप, लेटर प्याड, डेलको ल्याप्टप एकथान, ब्रदर्शको प्रिन्टर एक थान, ब्रदर्शको कलर प्रिन्टर एक थान र एचपीको पेनड्राइभ एक थानसहित नियन्त्रणमा लिएर दुवैजनामाथि लिखितसम्बन्धी कसुरमा मुद्दा दर्ता गरी आवश्यक अनुसन्धान भइरहेको डिएसपी घिमिरेले बताए ।