व्यावसायिक महिला क्लबको पर्वतमा निः शुल्क आँखा शिविर

आठ सय ९२ जनाको आँखा परिक्षण, ७७ जनाको अप्रेशन

पोखरा मंसिर ६, पोखरा महानगरपालिका वडा नम्वर १ शंकर टोल स्थित पोखरा व्यावसायीक महिला क्लबले पर्वतमा निः शुल्क आँखा शिविर कार्यक्रम सम्पन्न गरेको छ । पर्वतको ढोरपाटन नगरपालिका वडा नम्वर १ स्थित बुर्तिबाङ प्राथमिक स्वास्थ्य केन्द्रमा आयोजना गरेको शिविर आँखाको परिक्षण पछि समस्या देखिएकाहरुको अप्रेशन समेत गरिएको थियो ।

क्लबले जर्मनीका माईकल बाउर र साथिहरु सँगै बाडेन बाडेनको आर्थिक सहयोग र हिमालय आँखा अस्पताल पोखराको प्राविधिक सहयोगमा तीनदिने शिविर सम्पन्न गरेको हो । शिविर संचालनको लागि स्थानिय रुपमा ढोरपाटन नगरपालिका, लायन्स क्लब अफ ढोरपाटन, ढोरपाटन चेम्वर अफ कर्मश र बुर्तिबाङ राईजिङ युथ क्लबले सहयोग गरेका थिए ।

बुर्तिबाङ प्राथमिक स्वास्थ्य केन्द्र परिसरमा आयोजित शिविरमा विद्यालयमा अध्ययन गर्ने विद्यार्थी सँगै स्थानिय बासिन्दा सँगै वरिपरिका क्षेत्रबाट आएका मानिसहरुको सहभागिता रहेको क्लबकी उपाध्यक्ष एंव निः शुल्क आँखा शिविर कार्यक्रमकी संयोजक धनेश्वरी पराजुलीले जानकारी दिईन्। शिविरमा आठ सय ९२ जनाको आँखा परिक्षण सँगै आवश्यक औषधी वितरण गरिएको थियो ।

आँखा जाँच गरेकाहरुमध्ये ७७ जनाको आँखामा समस्या देखिएपछि उनिहरुको अप्रेशन गरिएको संयोजक पराजुलीले जानकारी दिईन् । ७७ जनामध्ये सात जनाको दुबै आँखाको अप्रेशन गरिएको थियो । विगत केही समयदेखि आँखाका कारण समस्यामा परेकाहरु शिविरमा उपचार पछि आँखा देख्न सफल भएका थिए ।

यसअघि कार्यक्रमको उद्घाटन ढोरपाटन नगरपालिकाका मेयर देब कुमार नेपालीले कार्यक्रमको ब्यानरमा हस्ताक्षर गरि गरेका थिए ।कार्यक्रममा क्लबकी उपाध्यक्ष एंव कार्यक्रम संयोजक पराजुली, सचिब इन्दु भट्टराई र सदस्य रजनी श्रेष्ठलगायतको उपस्थिती रहेको थियो ।

क्लवले यस अघि पर्वतको मोदि गाँउपालिका ७ राम्जाठाटी स्थित पशुपति माध्यमिक विद्यालयमा, पोखरा महानगरपालिका १५ स्थित परोपकार गुरुकुल आश्रममा, पर्वतको मोदि गाउँपालिका वडा नम्वर १ सेराबेशि लगायतका स्थानमा निः शुल्क आँखा शिविर संचालन गरिसकेको छ ।

यसै गरि हिमालय आँखा अस्पताल पोखरालाई करिव आठ लाख मुल्य बरावरको आँखा जाँच्ने मेसिन सहयोग गरेको थियो ।