मौन अवधिको निगरानीका लागि १८ स्थानमा सहसचिवले नेतृत्व गरी आयोगको टोली खटिने

काठमाडौं । स्थानीय तह निर्वाचन २०७९ को लागि मौन अवधि आज राति १२ बजेबाट सुरु हुने भएको छ। निर्वाचन आयोगले निर्वाचन हुने मितिले ४८ घण्टा अघिदेखि मतदान केन्द्र बन्द नहुञ्जेलको अवधिलाई मौन अवधि भनेको छ।

आयोगका अनुसार बैशाख ३० गते हुने स्थानीय तहको निर्वाचनका लागि मंगलबार राति १२ बजेको समयदेखि मौनअवधि सुरु हुने गर्छ। आयोगले मौन अवधि सुरु भएपछि गर्न हुने र नहुने विभिन्न मापदण्ड बनाएको छ। र यसको निगरानी पनि आफै गर्ने भएको छ।

आयोजका प्रवक्ता शालीग्राम पौडेलका अनुसार देशका विभिन्न १८ स्थानमा केन्द्र बनाएर सहसचिवको नेतृत्वको टोलीले मौनअवधिको निगरानी गर्ने छ। यसबाहेक निगरानीका लागि जिल्लामा मुख्य अधिकृतको नेतृत्वमा संयन्त्र र पालिकामा निर्वाचन अधिकृतको नेतृत्वमा संयन्त्र छ । मौन अवधि उल्लङ्घन गर्नेलाई आयोगले रु एक लाखसम्म जरिवाना तथा उम्मेदवारी रद्द गर्न सक्नेसम्मको सजायको निर्णय गर्न सक्ने अधिकार रहेको प्रवक्ता पौडेलले जानकारी दिए।

मौनअवधिमा के के गर्न हुँदैन ?

आयोगले स्थानीय तह निर्वाचनका दिन बिहान ७ देखि साँझ ५ बजेसम्म मतदानको व्यवस्था गरिएको जनाएको । मौनअवधि सुरु हुनुभन्दा अगाडि मतदानस्थलको ३०० मिटर वरिपरि राखिएका राजनीतिक दल वा उम्मेदवारका प्रचारप्रसारका सामग्री हटाउनुपर्ने आयोगले निर्वाचनका लागि जारी गरेको निर्वाचन आचारसंहितामा उल्लेख छ। आचारसंहितामा मौनअवधिमा राजनीतिक दलका पदाधिकारी वा उम्मेदवार तथा दलको भ्रात सङ्गठन वा सम्बन्धित व्यक्तिले आचरणपालना गर्नुपर्ने विषयबारे उल्लेख छ ।

यसैगरी मौन अवधिभर निर्वाचन प्रचारप्रसारलगायत कुनै पनि प्रकारका छलफल, अन्तरक्रिया, सभासम्मेलन, कार्यशाला गोष्ठी आदि गर्न नहुने आयोगका प्रवक्ता शालिग्राम शर्मा पौडेलले जानकारी दिनुभयो । साथै यस अवधिमा कुनै पनि विधि, प्रक्रिया वा माध्यमबाट मत माग्न वा निर्वाचन प्रचारप्रसार गर्न पाइने छैन ।

सामाजिक सञ्जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचारप्रसारका सामग्री पोष्ट वा शेयर गर्न वा गराउन नहुने आचारसंहितामा उल्लेख छ ।