गौशालामा देखिए एउटै नम्बर प्लेटका दुई मोटरसाइकल

काठमाडौँ । काठमाडौँको गौशालामा एउटै नम्बर प्लेटका दुईवटा बाइकहरु भेटिएका छन्। बुधबार विहान साढे ८ बजे गौशालाको जाममा परेका प्रदिप जंग शाहले खिचेको फोटो रुटिन अफ नेपाल बन्दले सार्वजनिक गरेको थियो।

रुटिन अफ नेपाल बन्दले फोटो सामाजिक संजालमा राखेपछि भाइरल भएको छ। भाइरल फोटोमा प्रदेश र लट नम्बरसमेत एउटै देखिन्छ। तस्विरमा दुबै मोटरसाइकलको नम्बर प्लेटमा बागमती प्रदेश ०२२ प २३८० लेखिएको स्पष्ट देखिन्छ ।

ट्राफिक प्रहरीले यसबारे जाँचबुझ सुरु गरेको बताएको छ। ट्राफिक प्रहरीका प्रवक्ता सञ्जीवदास शर्माले यस विषयमा बुझेर खबर गर्न मातहतका कर्मचारीलाई निर्देशन दिएको जानकारी दिए। उनले यस विषयमा यातायात विभागलाई समेत पत्र लेखेर छानविन गर्न लागेको जानकारी दिए।