प्रचारात्मक कामलाई अघि बढाइन्छ : अध्यक्ष ओली

काठमाडौँ । नेकपा (एमाले)का अध्यक्ष केपी शर्मा ओलीले पार्टीको वैचारिक, सङ्गठनात्मक र प्रचारात्मक कामलाई विशेष प्राथमिकता दिएर अगाडि बढाउने बताएका छन्।

प्यूठान–काठमाडौँ सम्पर्क मञ्चले शनिवार आयोजना गरेको कार्यक्रममा उनले पार्टीलाई सङ्गठनात्मक रूपमा एकताबद्ध बनाएर अगाडि बढाइने बताए। नेता ओलीले पार्टीका वास्तविक नीतिलाई कार्यकर्ता र जनतासमक्ष लैजाने दृढता व्यक्त गरे।

पार्टी, जनवर्गीय सङ्गठन र तिनका सबै तहलाई चुस्त, दुरुस्त बनाउने उनको भनाइ छ । “पाटी कमिटी ठुला भद्दा छन् । ती काम गर्न नसक्ने छन् । ती नाम मात्रका कमिटी नेताको काम आसन ग्रहण गर्ने मात्र होइन । नेताको काम कार्यकर्ता र जनताकोमा जाने र उनीहरूलाई सक्रिय बनाएर पार्टी नीतिअन्तर्गत सङ्गठन विस्तार गर्ने हो”, उनले भने।

पूर्वप्रधानमन्त्री ओलीले पार्टीका कमिटी ठुला भएकाले सङ्गठनात्मक र आन्दोलनका काम हुन नसकेको भन्दै आसन ग्रहण गराउने मात्र काम भएको बताए। उनले पार्टी एक ढिक्का भएर जनतासमक्ष जाने हो भने निर्वाचन जित्न सकिने विश्वास व्यक्त गरे।

एमालेको मात्र राष्ट्रिय स्वार्ध रहेकाले सरकार सञ्चालनको हैसियत प्राप्त गरेको उनको दाबी थियो । “दलगत स्वार्थभन्दा माथि उठेर राष्ट्रिय स्वार्थ, जनताको हित, राष्ट्रको हित विकासका आकाङ्क्षा, जनताका समस्याको सम्बोधनलाई केन्द्रबिन्दुमा राखेर एमालेले सोचिरहेको छ । सत्ता स्वार्थमा राखेर होइन”, उनले भने।

कार्यक्रममा सांसद सूर्य थापाले मुलुकलाई स्थिरता दिने पार्टी एमाले मात्र भएको दाबी गरे ।