‘टुटल र पठाओ’ माथि ट्राफिक प्रहरीले थाल्यो कारबाही

काठमाडौं, मंसिर ८- प्रायोजन विपरीत मोटरसाइकल चलाएको आरोपमा पठाओका चालक ट्राफिक कारबाहीमा परेका छन् ।महानगरीय ट्राफिक प्रहरी वृत्त, स्वयम्भुका प्रहरी जवान विजय मण्डलले बा ७७ प ८१९९ नम्बरको मोटरसाइकल चालक विकास तामाङलाई भाडामा यात्रु ओसारेको आरोपमा जरिवाना लिएका हुन् ।

ट्राफिकले काटेको जरिवानाको चिटमा प्रयोजनविपरीत सवारी चलाएको उल्लेख गरिएको छ । सिन्धुपाल्चोकका तामाङले विगत ४ महिनादेखि पठाओमा काम गरिरहेका थिए ।

यातायात व्यवस्था विभागले निजी प्रयोजनको लागि दर्ता भएका सवारीलाई भाडा लिई यात्रु ओसारपसार गर्न रोक लगाएसँगै ट्राफिक प्रहरीले टुटल र पठाओका चालकलाई कारबाही गर्न थालेको हो ।

विभागले मंसिर ३ गते विज्ञप्ति जारी गर्दै ‘टूटल’ र ‘पठाओ’ लगायतका सवारी साधनले निजी सवारीलाई पनि भाडा लिएर यात्रु ओसारपसार गर्नु कानुनको उल्लंघन भएको जनाएको थियो ।
यसअघि पनि र्दुईपांग्रे सवारी प्रयोगकर्ता र उपभोक्ताबीच मध्यस्थता गराई भाडामा यात्रु बोक्दै आएको टुटल र पठाओले गैरकानूनी काम गरेको भन्दै विवाद आएको थियो । एउटा प्रयोजनका लागि दर्ता भएको सवारी साधन अर्को प्रयोजनमा प्रयोग नगर्न विभागले सचेत गराएको छ ।

विभागले यातायात व्यवस्था ऐनको दफा ८ ९१० मा ‘निजी सवारी सार्वजनिक यातायात सेवाका लागि प्रयोग गर्न पाइने छैन’ र दफा १२ मा ‘कुनै एक प्रयोजनका निम्ति दर्ता भएको सवारी अर्को प्रयोजनमा लगाउन पाइने छैन’ भन्ने व्यवस्था अनुसार निजी सवारीसाधन सार्वजानिक प्रयोजनको लागि प्रयोग गर्न नपाइने बताएको हो।