आठ महिनामा काठमाडौं महानगरको राजस्व सङ्कलन करिब ४४ प्रतिशत मात्रै

काठमाडौं । काठमाडौं महानगरपालिकाले चालु आर्थिक वर्ष २०७९/८० को आठ महिनामा ४३.८२ प्रतिशत राजस्व सङ्कलन गरेको छ ।

महानगरपालिकाले चालु आवमा १० अर्ब ४१ करोड ९५ लाख राजस्व उठाउने लक्ष्य राखेकामा चार अर्ब ५६ करोड ६२ लाख उठाएको जनाएको छ ।

महानगरपालिकाको राजस्व विभागका अनुसार सबैभन्दा धेरै राजस्व सङ्कलन मनोरञ्जन करमार्फत उठेको छ । मनोरञ्जन करमा ५० लाख राजस्व उठाउने लक्ष्य राखेको महानगरले एक सय ८१ प्रतिशत अर्थात् ९० लाखभन्दा धेरै राजस्व उठाएको छ । महानगरले रकमका आधारमा सबैभन्दा धेरै कर घरबहाल कर उठाएको छ ।

महानगरले रु दुई अर्ब राजस्व उठाउने लक्ष्य राखेको घरबहाल करमा आठ महिनामा एक अर्ब १८ करोड सङ्कलन गरेको जनाएको छ । महानगरले सम्पत्ति करमा चालु आवमा एक अर्ब राजस्व उठाउने लक्ष्य राखेकामा ६५ करोड उठाएको छ ।

यसैगरी नक्सापास दस्तुरबाट ४१ करोड उठेको छ । उक्त शीर्षकमा महानगरले चालु आवभरिमा ७५ करोड राजस्व उठाउने लक्ष्य राखेको छ ।