उम्मेदवारी दर्तापछि रविले भने : यो देशमा म घाँडो नै भएको हो भने मारिदिए पनि भयो

काठमाडौं । राष्ट्रिय स्वतन्त्र पार्टीका सभापति रवि लामिछानेले आज चितवन २ मा उपचुनाव लड्न आफ्नो मनोनयन दर्ता गरे ।

उनी पार्टीको दलबलसहित मनोनयन दर्ताका लागि निर्वाचन अधिकृतको कार्यालय पुगेका थिए ।

मनोनयन दर्ताअघि सञ्चारकर्मीहरूले रविलाई घेरेर केही प्रश्न सोध्न भ्याए ।

सञ्चारकर्मीको प्रश्न मूलतः अदालतमा उनी विरुद्ध दायर गर्न लागिएको पासपोर्ट दुरुपयोगको मुद्दासँग सम्बन्धित थियो ।

यस विषयमा रविले आफ्नो प्रष्टीकरण मात्रै दिएनन्, आक्रोश र दिक्दारी पनि व्यक्त गरे । आफूले हरेक न्यायिक प्रक्रियालाई स्वीकार्ने र स्वीकार्दै आइरहेको उनले बताए । तर अनाहकमा दुख दिन खोजिएकोप्रति खेद व्यक्त गरे ।

उनले भने, ‘अदालतको पूर्ण पाठमा नै लेखिएको छ कि २०१८ मा त्यागिसकिएको भनेर लेखिएको छ । त्यसलाई पनि कसैले व्याख्या गर्छ भने‘ यदि यो देशमा म घाँडो नै भएको हुँ भने त मारिदिए पनि भइहाल्यो, त्यो एउटा उपाय त छ नि‘अरू त‘’

पत्रकारले रविलाई तपाईँको उम्मेदवारीमा कुनै कानूनी उल्झन हुन्छ कि हुँदैन भनेर सोधेका थिए ।

उनले जवाफ दिए, ‘मैले कानूनी उल्झन केही देखेको छैन । के छ र यसमा बाँकी? तर, कसैले कसैलाई चाह्यो भने‘ यो देशमा‘ मैले तपाईँलाई चाहेँ भने पाँच दिन स्टडी गरेर सय वटा मुद्दा ठोक्दिन सक्छु । मलाई दुखै दिने, खत्तमै पार्ने भनेर भएभरका सारा शक्ति लागेर सक्नै पर्ने पात्र म हो कि होइन थाहा छैन‘ के त्यस्तो अपराध गरेको छु थाहा छैन‘ होइन भने मैले न्यायिक र अदालती प्रक्रियाबाट टुंगिसकेको कुराहरूलाई‘ न मेरो कुनै पावर छ, न पहुँच छ‘ न म मुद्दा प्रभावित पार्न सक्छु‘ मसित केही छ ती जनता हुन् । सबैभन्दा शक्तिशाली भनेको सार्वभौम जनता हुन् ।’